काठमाडौं, ५ मंसिर । एमाओवादी अध्यक्ष पुष्पकमल दाहाल प्रचण्डले सरकार, प्रमुख प्रतिपक्ष र तराई–मधेसमा आन्दोलनरत दलहरूबीचको वार्ताको प्रयासलाई जारी राखेका छन् ।
औपचारिक वार्ताको वातावरण बनाउन उच्चस्तरीय राजनीतिक संयन्त्रका संयोजकसमेत रहेका प्रचण्डले शुक्रबार प्रमुख प्रतिपक्ष दल कांग्रेसका नेता र संयुक्त लोकतान्त्रिक मधेसी मोर्चाका नेताहरूसँग टेलिफोन संवाद गरेको नयाँ पत्रिका दैनिकले छापेको छ ।
प्रचण्डले कांग्रेस कार्यबाहक सभापति रामचन्द्र पौडेल र तराई मधेस सद्भावना पार्टीका अध्यक्ष महेन्द्र राय यादवसँग टेलिफोन संवाद गरेका थिए ।
प्रचण्डले पौडेल र यादवलाई समस्या समाधानका लागि गम्भीर भइदिन आग्रह गरेका थिए ।
‘सहमतिका लागि अध्यक्ष प्रचण्ड अनौपचारिक संवादमा हुनुहुन्छ,’ उनका सहयोगी शिव खकुरेलले भने, ‘आज (शुक्रबार) कांग्रेस कार्यबाहक सभापति रामचन्द्र पौडेल र तमसपाका अध्यक्ष महेन्द्र राय यादवसँग टेलिफोन संवाद गर्नुभयो ।’
टेलिफोन संवादमा पौडेलले समस्या समाधानका लागि कांग्रेसले पनि पहल थालेको जानकारी दिएका थिए ।
प्रचण्ड र पौडेलबीचको संवादपछि शनिबार बिहान सत्तापक्ष र प्रमुख प्रतिपक्षबीच वार्ता हुने भएको छ ।
स्रोतका अनुसार सत्तापक्ष र प्रतिपक्ष कांग्रेसको साझा धारणा बनाएर मात्रै मधेसी मोर्चासँग वार्तामा बस्नेमा दुवै पक्ष सहमत भएका छन् ।
प्रतिक्रिया