सिंहदरबारमा मधेसी मोर्चाको बैठक जारीः नयाँ आन्दोलनको घोषणा हुँदै

काठमाडौं, ३ मंसिर । सत्तारुढ दलहरुसँगको वार्ता, आन्दोलन र भावी रणनीति तयार पार्न संयुक्त लोकतान्त्रिक मधेसी मोर्चाको बैठक अहिले सिंदरबारमा बसिरहेको छ ।

संघीय समाजवादी फोरम नेपाल संसदीय दलको कार्यालयमा बिहान ११ देखि सुरु भएको वार्तामा नयाँ आन्दोलनमा जाने बारे छलफल भइरहेको छ । बैठकमा आन्दोलन र वार्ताका क्रममा देखिएका विषयमा समीक्षा भइरहेको सद्भावना पार्टीका महासचिव मनीष सुमनले जानकारी दिनुभयो ।

‘अब आन्दोलनलाई थप उचाइँमा पुराउने निर्णय हुन्छ’, उहाँले भन्नुभयो, ‘सरकार पक्ष दलहरुको भुलभुलैयामा मधेसी मोर्चा लाग्दैन ।’
महासचिव सुमनले सरकारले मधेसी मोर्चाका मागप्रति गम्भीरतापूर्वक कहिल्यै ध्यान नदिएको उल्लेख गर्नुभयो ।

सरकारसँग वार्ता गर्दै आएको मधेसी मोर्चाले माग पूरा गराउन दबाव दिने उद्देश्यले तराई मधेसका जिल्लाहरुमा बिकेन्द्रित आन्दोलन गर्ने तयारी गरेको छ । नाकाबन्दीलाई यथावत राख्दै थप कडा आन्दोलन घोषणा गरिने सुमनले उल्लेख गर्नुभयो ।