सरकारमा को हुन् नाकाबन्दी खोल्न नदिने तत्व ?

काठमाडौं, २४ कात्तिक । संयुक्त लोकतान्त्रिक मधेसी मोर्चाका वार्ता टोली सदस्य एवम् सद्भावना पार्टीका सहअध्यक्ष लक्ष्मणलाल कर्ण वर्तमान सरकारमा केही तत्व वार्ता विरोधी रहेको आरोप लगाउनुभएको छ ।

नेपालवाणी रेडियो नेटवर्कमा पत्रकार ऋषि धमलासँग आज (मंगलबार) बिहान कुरागर्दै नेता कर्णले वार्ता सकारात्मक रुपमा अगाडि बढ्दै गर्दै सरकारभित्र रहेका केही तत्वले विथोल्ने गरेको बताउनुभयो ।

‘सरकारभित्र केही मन्त्री र तत्व वार्ता विरोधी छन् । जसले वार्ता नै चाहँदैन । नाकाबन्दी खोल्न चाहँदैनन्’, उहाँले भन्नुभयो, ‘वार्ता हुन थाल्दा आन्दोलनमा दमन गरेर वार्ता विथोलिदिन्छन् । यस्ता तत्वको खोजी गर्नुपर्छ ।’

वार्ता विथोल्ने गतिविधि केही मन्त्रीले सरकारी पक्षबाट हुने गरेको भन्दै सहअध्यक्ष कर्णले भन्नुभयो, ‘सप्तरीमा आइतबार राति आन्दोनलमा दमन गरेर वार्ता विथोलिएको छ ।’

सद्भावनाका सहअध्यक्ष कर्णले भन्नुभयो, ‘वार्ता कसले विगारिरहेको छ ? खोज्नु पर्ने भएको छ ।’

वार्ता विथोलेको आरोप लगाए पनि सद्भावना पार्टीका सहअध्यक्ष कर्णले नाकाबन्दी खोल्न को–कोले अबरोध गरेका हुन् त्यसको नाम भन्नुभएन ।

उहाँले प्रधानमन्त्री केपी ओली र गृहमन्त्री शक्ति बस्नेतले वार्ता र सम्वाद नचाहेको संकेत भने गर्नुभएको थियो ।