काठमाडौँ, २१ कात्तिक । उपप्रधान तथा रक्षामन्त्री भीम रावलले संविधान जारी भएसँगै भारतले अघोषित रूपमा गरेको नाकाबन्दीको समस्यालाई जतिसक्दो चाँडो समाधान गरी सरकार संविधान कार्यान्वयनको बाटोमा अगाडि बढ्ने बताउनुभएको छ ।
विजयादशमी, दीपावली, नेपाल संवत्, इदलगायत नेपाली पर्वहरूको अवसरमा नेकपा (एमाले) निकट युवा सङ्घ नेपाल उपत्यका समन्वय समितिद्वारा यहाँ आज आयोजित शुभकामना आदानप्रदान तथा चियापान कार्यक्रममा उपप्रधानमन्त्री रावलले संविधान जारी गर्नुभन्दा पनि कार्यान्वयनको पाटो चुनौतीपूर्ण हुने भन्दै कार्यान्वयनका लागि सरकार, बाहिर रहेका सबै दलको उत्तिकै भूमिका हुने बताउनुभयो ।
“मुलुक परिवर्तनको क्रममा विभिन्न चरणमा भएका सङ्घर्षबाट प्राप्त गणतन्त्र, लोकतन्त्र, समावेशीता र युगौँदेखि उत्पीडनमा पारिएको दलित, महिला, आदिवासी जनजाति र अन्य उत्पीडित समुदायको अधिकारलाई सुनिश्चित गरी संविधान बनेको छ, यसलाई कार्यान्वयन गर्न सबैले आ–आफ्नो ठाउँबाट सहयोगी भूमिका निर्वाह गर्नुपर्छ’–उपप्रधानमन्त्री रावलले भन्नुभयो ।
उहाँले तराईमा आन्दोलनरत मधेसी दललाई आन्दोलन फिर्ता लिएर वार्ता र सहमतिका आधारमा समाधान खोज्न आग्रह गर्दै नेपालमा संविधान जारी हुँदा संसारले खुसी व्यक्त गरिरहँदा छिमेकी मुलुक भारतले अघोषित रूपमा नाकाबन्दी गर्नु मानवता विरोधी भएको टिप्पणी गर्नुभयो ।
सूचना तथा सञ्चार प्रविधि मन्त्री शेरधन राईले ९५ प्रतिशत जनताको समर्थनमा ६५ वर्षदेखिको नेपाली जनताको नयाँ संविधान पाउने सपना पूरा भएको भन्दै राष्ट्रपति र सभामुखको निर्वाचनसँगै संविधान कार्यान्वयन प्रक्रिया सुरु भएको बताउनुभयो ।
आन्दोलनरत दलले उठाउँदै आएको जायज मागलाई सरकारले वार्ता र सहमतिको आधारमा समाधान गर्दै नेपाली जनताले भोग्दै आएको सङ्कटलाई समाधान गरी संविधान कार्यान्वयनसँगै मुलुकलाई विकासको बाटोमा अगाडि बढाउनेमा जोड दिनुभयो ।
उहाँले वैशाख १२ गते गएको विनाशकारी भूकम्पपछिको पुनःनिर्माण कार्यमा सहभागी हुन युवालाई आग्रह गर्नुभयो ।
पूर्वमन्त्री तथा युवा सङ्घ नेपालका पूर्व अध्यक्ष महेश बस्नेतले नेपालीले भागिरहेको वर्तमान सङ्कटलाई चिर्दै नेपाललाई अब आत्मनिर्भर मुलुकका रूपमा विकास गर्नुपर्ने बताउनुभयो । रासस
प्रतिक्रिया