– विमल योगी
काठमाडौं, १५ कात्तिक । सरकार र संयुक्त लोकतान्त्रिक मधेसी मोर्चाको आजको वार्ता पनि विना निष्कर्ष टुङ्गिएको छ ।
संघीय समाजवादी फोरमको कार्यालय तीनकुनेमा भएको वार्तामा सरकारी टोलीले मोर्चाको माग पुरा गर्ने प्रतिबद्धता जनाएको छ । वार्ता टोलीका संयोजक एवं उपप्रधान तथा परराष्ट्रमन्त्री कमल थापाले मधेसी मोर्चाको मूख्य माग सीमाकंन टुङ्गयाउन सरकारले दुई प्रतिबद्धता जनाएको जानकारी दिनुभयो ।
सीमांकनको माग राजनीतिक सहमतिबाट टुङ्गो लगाएर संवैधानिक प्रक्रियाबाट टुंग्याउने प्रतिबद्धता
उहाँले भन्नुभयो- ‘मधेसी मोर्चाका साथीहरुसँग सीमाकंनको माग राजनीतिक सहमतिबाट टुङ्गो लगाएर संवैधानिक प्रक्रियाबाट टुङ्गयाउने प्रतिबद्धता जनाएका छौं । र त्यसका लागि आजैदेखि गृहकार्य गरेर छिट्टै अर्काे वार्तामा सहमतिमा पुग्छौं ।’
सरकारका तर्फबाट माग पुरा गर्ने प्रतिबद्धता आएपनि मधेसी मोर्चाले आन्दोलन फिर्ता नलिने जनाएको छ । मोर्चा वार्ता टोलीका सदस्य लालबाबु राउतले आजको वार्ता सकारात्मक भएको र सरकारबाट मोर्चाका मागहरु स्वीकार गरी प्रतिबद्धता जनाएको बताउनुभयो । तर, मोर्चाका मागहरुलाई राजनीतिक संवैधानिक रुपमा नगरेसम्म आन्दोलन फिर्ता नहुने उहाँको भनाई छ ।
प्रतिक्रिया