५ मंसिर २०८३, शनिबार

बंगलादेशमा युनुसको घरपछि विदेश राज्यमन्त्रीको निवासमा पनि आगजनी

0
Shares

फन्ट परिवर्तन गर्नुहोस:

  • change font
  • change font
  • change font

ढाका । बंगलादेशका विदेश राज्यमन्त्री हुमायुन कबीरको घरमा पेट्रोल बम प्रहार गरी आगजनी गरिएको छ ।

शुक्रबार घटना हुँदा कबीर त्यहाँ थिएनन् ।

आक्रमणपछि उक्त घरको सुरक्षा व्यवस्था कडा पारिएको छ । कबीरले यस आक्रमणका लागि अपदस्थ प्रधानमन्त्री शेख हसिनाको दल आवामी लिगलाई दोष दिएका छन् ।

यस घटनाभन्दा एक दिनअघि हसिनाको दलले बंगलादेशमा राष्ट्रव्यापी हड्ताल आह्वान गरेको थियो, सोही क्रममा बंगलादेशको अन्तरिम सरकारका प्रमुख मुहम्मद युनुसको निवासमा पनि आगजनी गरिएको थियो ।

त्यसको एक दिनपछि कबीरको निवासमा आगजनी गरिएको हो । यस घटनालाई लिएर अवामी लिगमाथि प्रहार गर्दै उनले उक्त दललाई ‘आतंककारी संगठन’ को संज्ञा दिए ।

कबीरले यस घटनाका लागि जिम्मेवार व्यक्तिहरूविरुद्ध कडा कानुनी कारबाहीको माग गरेका छन् ।

हसिनाले डिसेम्बरमा ढाका फर्कने घोषणा यसअघि नै गरिसकेकी छन् ।

उनको फिर्तीको समय नजिकिँदै गर्दा बंगलादेशमा हिंसा बढ्दै गएको हो ।

उनको दल अवामी लिगले आह्वान गरेको हड्तालका कारण बंगलादेशका विभिन्न भागमा हिंस्रक प्रदर्शन, तोडफोड र आगजनीका घटनाहरू भएको छ ।

बिहीबार प्रदर्शनकारीहरूले अन्तरिम सरकारका प्रमुख युनुसको निवासमा आगजनी गरेका थिए ।

यसैबीच, प्रधानमन्त्री तारिक रहमानले अवामी लिगमाथि देशभित्र हिंसा भड्काएको र षड्यन्त्र रचेको आरोप लगाएका छन् ।

उनले भारतप्रति पनि अप्रत्यक्ष रूपमा कटाक्ष गरेका छन् ।

एक सभालाई सम्बोधन गर्दै रहमानले १६ वर्षसम्म बलपूर्वक सत्तामा टिकिरहेपछि देश छोडेर भागेकाहरूले अहिले सीमापारिबाट बंगलादेशविरुद्ध षड्यन्त्र रचिरहेका आरोप लगाए ।

रहमानले भनेका छन्, ‘उनीहरूका मालिकहरू तिनै देशमा छन् जहाँ उनीहरू भागेर गएका छन् । तिनै मालिकहरूलाई खुसी पार्न उनीहरू बंगलादेशविरुद्ध षड्यन्त्र गरिरहेका छन् ।’