एमाले अध्यक्ष ओलीको अपिल : राष्ट्रिय एकता, सामाजिक सद्भाव र शान्ति कायम राखौँ

काठमाडौं । नेकपा (एमाले) का अध्यक्ष केपी शर्मा ओलीले सुनसरीको देवानगञ्जलगायतका विभिन्न स्थानमा भइरहेको हिंसात्मक गतिविधि तत्काल रोक्दै संवाद र सहमतिमार्फत समस्याको समाधान खोज्न सरकार तथा सम्बन्धित पक्षसँग आग्रह गरेका छन्।

ओलीले राष्ट्रिय एकता, सामाजिक सद्भाव र शान्ति कायम राख्न सम्पूर्ण नागरिक, राजनीतिक दल, नागरिक समाज, सञ्चारकर्मी तथा विभिन्न धार्मिक एवं सामाजिक समुदायका अगुवाहरूलाई संयमित र जिम्मेवार भूमिकामा उत्रिन अपिल गरेका हुन्।

आज जारी गरेको प्रेस विज्ञप्तिमार्फत अध्यक्ष ओलीले देवानगञ्ज गाउँपालिकामा केही दिनदेखि उत्पन्न तनाव, राज्य पक्षबाट भएको बल प्रयोग तथा गोली लागेर स्थानीय युवा ओमप्रकाश मेहता र सिरहाका गणेश यादवको भएको निधनप्रति गम्भीर आपत्ति जनाएका छन्। उनले घटनामा ज्यान गुमाउनेहरूप्रति श्रद्धाञ्जली अर्पण गर्दै शोकसन्तप्त परिवारजनप्रति समवेदना व्यक्त गरेका छन्।

हिंसाको क्रम रोकिनुको सट्टा सिरहासहित विभिन्न स्थानमा समेत गोली चलेर थप नागरिकको ज्यान गएको खबरले आफूलाई स्तब्ध र मर्माहत बनाएको ओलीले बताएका छन्। साथै, घाइते नागरिकहरूको शीघ्र स्वास्थ्यलाभको कामना गरेका छन्।

अध्यक्ष ओलीले जनतालाई आपसमा विभाजित गर्दै अवाञ्छित उद्देश्य पूरा गर्ने षड्यन्त्र हुन सक्नेतर्फ सचेत रहन आग्रह गर्दै कुनै पनि प्रकारको भ्रामक प्रचारको पछि नलाग्नसमेत अपिल गरेका छन्।

अध्यक्ष ओलीको अपिल–

१. संयमता र सामाजिक सद्भाव :
नागरिकहरूबीचको एकता र भ्रातृत्व नै राष्ट्रको बल हो । जनतालाई आपसमा विभाजित गर्दै अवाञ्छित उद्देश्य पूरा गर्ने षड्यन्त्रहरू भइरहेको हुन सक्नेतर्फ सचेत हुँदै नेकपा (एमाले) र अन्य राजनीतिक पार्टीका नेता-कार्यकर्ता, नागरिक समाज र सञ्चारकर्मी लगायत सम्पूर्ण आम नागरिकहरूलाई कुनै पनि प्रकारको भ्रामक प्रचारको पछि नलागी संयमित हुन, सामाजिक सद्भाव र एकता कायम राख्नकालागि सक्रिय हुन हार्दिक अनुरोध गर्दछु ।

२. सरकारको गैरजिम्मेवार भूमिका र मौनता :
नागरिकको जीउधनको रक्षा गर्नु र संवादको माध्यमबाट समस्याको समाधान गरी देशलाई शान्तिको बाटोमा लैजानु सरकारको प्राथमिक दायित्व हो । तर, राष्ट्रिय सुरक्षा र सामाजिक सुव्यवस्था संवेदनशील अवस्थामा पुग्दा समेत सरकारले देखाएको उदासीनता, अत्यधिक बल प्रयोग र मौनता अत्यन्त शंकास्पद एवं भर्त्सनायोग्य छ । हिंसात्मक कदम तत्काल रोकी अविलम्ब संवादको माध्यमबाट समाधान खोज्न आग्रह गर्दछु ।

३. दलहरूबीच राजनीतिक सहकार्य :
मुलुक विषम परिस्थितिबाट गुज्रिरहेको बेला मुख्य राजनीतिक दलहरूले आपसी राजनीतिक प्रतिस्पर्धा, आरोप९प्रत्यारोप र सस्तो लोकप्रियताभन्दा माथि उठेर मुलुकमा शान्ति, सुरक्षा र स्थायित्व कायम गर्न सहकार्य गर्नु आवश्यक छ ।

४. राष्ट्रिय एकता र शान्तिका लागि आह्वान :
द्वन्द्व र हिंसाबाट समस्याको समाधान हुन सक्दैन । संवाद, सहमति र जिम्मेवार सहकार्यले नै वर्तमान जटिलताबाट मुलुकलाई निकास दिने छ ।
राष्ट्रको अस्तित्व, शान्ति-सुरक्षा र सामाजिक सद्भावमाथि संकट आउन लागेको यस घडीमा म सम्पूर्ण राजनीतिक दल, नागरिक समाज, बुद्धिजीवी तथा विभिन्न धार्मिक एवं सामाजिक सम्प्रदायका अगुवाहरूलाई राष्ट्रिय हित र शान्ति स्थापनाका लागि एकजुट हुन हार्दिक आह्वान गर्दछु ।