अडिटको नाममा ५ लाख घुससहित लहानका कर अधिकृत पक्राउ

सिरहा । आन्तरिक राजस्व कार्यालय लहानका कर अधिकृत युवराज पाल ५ लाख रुपैयाँ नगद घुस सहित अख्तियार दुरुपयोग अनुसन्धान आयोगको टोलीले पक्राउ गरेका छन्।

अख्तियारको बर्दिबास कार्यालयबाट खटिएको टोलीले आज कार्यालय परिसरमै उनलाई नियन्त्रणमा लिएको हो।

गोलबजार नगरपालिका ६ स्थितको सिरहा सुपर मार्केट प्रालि (एबिमल) को आर्थिक वर्ष २०७८/७९ को पूर्ण कर परीक्षण (फुल अडिट) गर्ने नाममा कर अधिकृत पालले आफूभन्दा माथिका हाकिमलाइ समेत मिलाउनुपर्ने भन्दै सुरुमै ५ लाख रुपैयाँ अतिरिक्त रकम मागेका थिए ।

घुस नदिए अडिट प्रक्रिया अगाडि नबढाइने भन्दै कम्पनीसँग आवश्यक सम्पूर्ण कागजात समेत मागिएको थियो। अडिटका क्रममा कार्यालयले कर, जरिवाना तथा अन्य शीर्षकमा करिब २ करोड रुपैयाँसम्म कर दायित्व देखाएको थियो। कम्पनीले थप कागजात पेस गरेपछि उक्त दायित्व अझै ३० देखि ३५ लाख रुपैयाँसम्म बढ्न सक्ने जानकारी दिइएको पिडितले जनाएको छ।

यही अवस्थालाई आधार बनाएर कर अधिकृत पालले १२ लाख रुपैयाँ दिए सम्पूर्ण समस्या मिलाइदिने प्रस्ताव राखेको आरोप छ। कम्पनीले आर्थिक अवस्था कमजोर रहेको बताएपछि रकम घटाएर ५ लाख रुपैयाँमा सहमति गराउने प्रयास गरिएको बताइएको छ।

घुस बुझ्ने योजनाअनुसार कम्पनीका प्रतिनिधिलाई बुधबार दिउँसोदेखि प्रतिक्षामा राखिएको थियो। साँझ करिब ६:५६ बजे पालले फोन गरी आफू गोलबजार क्षेत्रमा रहेको जानकारी दिएका थिए। त्यसपछि पुनः सम्पर्क गर्दै रकम भोलिपल्ट बिहान ९ देखि १० बजेको बीचमा बुझाउन निर्देशन दिँदै एक बिचौलियाको नम्बर उपलब्ध गराएका थिए।

बिचौलियाले आफू बाहिर रहेको भन्दै आफ्ना भाइमार्फत रकम बुझाउन आग्रह गरेपछि अन्ततः पालले रकम कार्यालयमै ल्याउन भनेका थिए। कार्यालयमै ५ लाख रुपैयाँ घुस बुझ्ने क्रममा अख्तियार दुरुपयोग अनुसन्धान आयोगको टोलीले उनलाई रंगेहात पक्राउ गरेको हो। अख्तियार दुरुपयोग अनुसन्धान आयोग बर्दिबासका कार्यालय प्रमुख रामबहादुर कुरुम्वाङले कर अधिकृत पाललाई घुससहित पक्राउ गरिएको पुष्टि गर्दै घटनाबारे थप अनुसन्धान भइरहेको जानकारी दिए।

घटनाले कर कार्यालय भित्रको पारदर्शिता र सुशासनमाथि गम्भीर प्रश्न उठाएको छ। यस प्रकरणमा अन्य व्यक्तिको संलग्नता रहेकोरनरहेको विषयमा समेत अनुसन्धान अघि बढाएको अख्तियारले जनाएको छ।