नारायणगढ-काठमाडौं सडकखण्ड आज राति १० बजेदेखि बन्द

काठमाडौं । नारायणगढ–काठमाडौं सडक आज बेलुका १० बजेदेखि अनिश्चितकालका लागि बन्द गरिएको छ ।

लगातारको वर्षापछि उत्पन्न जोखिमलाई लिएर जिल्ला प्रशासन कार्यालय चितवनले अर्को सूचना जारी नभएसम्मका लागि बन्द गरेको हो ।

प्रमुख जिल्ला अधिकारी गणेश अर्यालद्वारा जारी सूचनामा यात्रुको सुरक्षालाई प्राथमिकतामा राख्दै नारायणगढ–मुग्लिन–काठमाडौँ सडकखण्डमा चल्ने सबै प्रकृतिका सवारीसाधनको आवागमन राति १० बजेदेखि अर्को सूचना प्रकाशित नभएसम्मका लागि रोक लगाइएको उल्लेख छ ।

यसबाट यात्रुहरूमा पर्न गएको असुविधाप्रति जिल्ला सुरक्षा समिति, चितवनले क्षमायाचना गर्दै आवश्यक सूचना, समन्वय तथा सहजीकरणका लागि नेपाल प्रहरीको १००, सशस्त्र प्रहरी बल नेपालको १११४, जिल्ला आपत्कालीन सञ्चालन केन्द्र (डीईओसी) को १२३४ तथा जिल्ला प्रहरी कार्यालय, चितवनका सूचना अधिकारीको ९८५५०१३९९९ नम्बरमा सम्पर्क गर्न अनुरोध गरेको छ।