भेनेजुएलामा लगातार दुई शक्तिशाली भूकम्प

काठमाडौं । भेनेजुएलामा लगातार दुई शक्तिशाली भूकम्प गएको छ ।

अमेरिका भूगर्भ सर्वेक्षणका अनुसार पहिलो भूकम्प ७.१ म्याग्निच्युडको थियो । यसको केन्द्रबिन्दु काराकासबाट लगभग १६० किलोमिटर पश्चिममा थियो र यो १३ किलोमिटर गहिराइमा गएको थियो । त्यसको केही समयपछि ७.५ म्याग्निच्युडको दोस्रो भूकम्प गयो । यसको केन्द्रबिन्दु मोरोन शहरको दक्षिणपश्चिममा थियो र यो १० किलोमिटर गहिराइमा गएको थियो ।

कोलम्बियामा पनि भूकम्पको धक्का महसुस गरिएको थियो ।

भूकम्पले राजधानी काराकास लगायत धेरै क्षेत्रहरूमा भवन र घरहरूमा क्षति पुगेको छ ।

स्थानीय सञ्चारमाध्यमका अनुसार काराकास विमानस्थलको छानाको एक भाग भत्किएको छ । भग्नावशेष खस्दा धुलोको ठूलो बादल उडिरहेको देखिएको छ ।

लगातार दुई ठूला भूकम्पबाट आतंकित भएर मानिसहरू आफ्नो घर र कार्यालयबाट बाहिर निस्किएका थिए ।