गृहमन्त्री गुरुङलाई कारबाही गर्नेबारे रास्वपाभित्र छलफल

काठमाडौं । राष्ट्रिय स्वतन्त्र पार्टी (रास्वपा)भित्र पार्टीका सांसद समेत रहेका गृहमन्त्री सुधन गुरुङमाथि लागेको आरोपबारे कारबाही गर्ने विषयमा छलफल सुरु भएको छ ।

आज बिहान पार्टीका महामन्त्री कवीन्द्र बुर्लाकोटी र अनुशासन आयोगका कार्यवाहक प्रमुख रमाकान्त रिमालबीच आन्तरिक छानबिनबारे कुराकानी भएको स्रोतले जनाएको छ ।

गुरुङको पक्राउ परेका विचौलिया दीपक भट्टसँग व्यापारिक सम्बन्ध रहेको खुलासा भएपछि उनको चौतर्फी आलोचना भइरहेको हो ।

गृहमन्त्री गुरुङलाई बर्खास्त गरी उनीमाथि छानबिन हुनुपर्ने माग उठिरहेको छ । जेनजी मुभमेन्ट नेपालले गुरुङलाई पदबाट बर्खास्त गरी पक्राउ गर्न तथा निष्पक्ष अनुसन्धान अघि बढाउन माग गरेको हो ।

मन्त्री पदमा रहँदा आफ्नैविरुद्ध निष्पक्ष छानबिन हुन नसक्ने भन्दै जेनजी मुभमेन्टले गुरुङलाई बर्खास्त गर्न माग गरेको हो ।

यसैबीच, यसबारे रास्वपाले आज दिउँसो ३ बजे बस्ने केन्द्रीय समिति बैठकमा छलफल गर्ने र आवश्यक निर्णय लिने तयारी गरेको बुझिएको छ ।