लिग २ सिरिज अघि नेपालले यूएईसँग दुई टी–२०आई खेल्ने

काठमाडौं । नेपाली क्रिकेट टोलीले यूएईसँग त्रिवि क्रिकेट मैदानमा दुई टी–२०आई खेल्ने भएको छ ।

आईसीसी क्रिकेट विश्वकप लिग २ अन्तर्गत नेपालमा हुने नेपाल, ओमान र यूएईबीचको शृंखलाअघि नेपालले यूएईसँग टी–२०आई खेल्ने भएको हो ।

नेपाल क्रिकेट संघ (क्यान) का अनुसार अप्रिल २० र २१ मा दुई खेल हुनेछन् । खेल त्रिवि क्रिकेट मैदानमा साढे ९ बजेदेखि हुनेछ । लिग २ को शृंखला भने अप्रिल २५ देखि हुँदैछ ।

नेपाल र यूएईबीचको खेललाई एसोसियट क्रिकेटको एल क्लासिकोका रूपमा समेत लिने गरिन्छ । पछिल्लोपटक टी–२० विश्वकप छनोटमा खेलेका थिए ।

नेपालमा लिग २ को अर्को शृंखला पनि हुनेछ । मे १२ देखि २२ सम्म नेपाल, अमेरिका र स्कटल्यान्ड सम्मिलित त्रिदेशीय शृंखला हुनेछ ।

यस्तै नेपालको ‘ए’ टोलीले पनि ओमान, स्कटल्यान्ड र अमेरिकासँग ५० ओभरको खेलहरू खेल्ने तय भएको छ ।