तेहरान, १२ कात्तिक । इरानले आइतबार इजरायलले अघिल्लो दिन गरेको हवाई आक्रमणको निन्दा गर्न संयुक्त राष्ट्रसंघीय सुरक्षा परिषद्को तत्काल बैठक बोलाउन माग गरेको छ ।
विदेशमन्त्री अब्बास अराघचीले राष्ट्रसंघ प्रमुख र परिषद्का प्रमुखलाई पत्र पठाउँदै ‘यो आक्रमणको निन्दा गर्न निर्णायक स्थिति लिन सुरक्षा परिषद्को तत्काल बैठकको माग’ गरेको मन्त्रालयको विज्ञप्तिमा उल्लेख छ ।
इजरायलले शनिबार इरानको अक्टोबर १ को आक्रमणको जवाफमा इरानका सैन्य स्थानहरूमा हवाई आक्रमण गरेको थियो । इरानको आक्रमण इरान समर्थित लडाकू नेताहरू र रेभोल्युसनरी गार्ड्सका कमान्डरको हत्याको प्रतिशोध थियो ।
आफ्नो पत्रमा अराघचीले ‘प्रक्षेपण गरिएका धेरैजसो प्रक्षेप्यास्त्र इरानको रक्षा प्रणालीद्वारा रोकिएको’ तर आक्रमणले ‘लक्षित विन्दुहरूमा’ क्षति पुर्याएको र चार सैनिकको मृत्यु भएको बताए । उनले इजरायली आक्रमण इरानको ‘सार्वभौमिकताको स्पष्ट उल्लङ्घन’ भएको र इरानले ‘यो आपराधिक आक्रमणको जवाफ दिने अन्तर्निहित अधिकार सुरक्षित राखेको’ बताए ।
इजरायली सेनाले विभिन्न क्षेत्रमा इरानी मिसाइल कारखाना, मिसाइल प्रतिष्ठान र अन्य प्रणालीमा आक्रमण गरेको र तेहरानलाई जवाफी कारबाही नगर्न चेतावनी दिएको बतायो ।
इरानले यो आक्रमणलाई कम आँकेको छ । केही राडार प्रणालीहरूमा ‘सीमित क्षति’ पुगेको बताउँदै मिडिया आउटलेटहरूले यस आक्रमणलाई ‘कमजोर’ भनी खारेज गरेका छन् । विश्लेषकहरूका अनुसार यसले इरानको थप तनाव बढाउने अनिच्छालाई सङ्केत गर्दछ । एएफपी
प्रतिक्रिया