कतारका लागि प्रस्तावित राजदूत पौडेलको कार्ययोजना- श्रमिकहरूको हित संरक्षणमा जोड दिने

काठमाडौं, १८ भदौ । संसदीय सुनुवाइ समितिमा कतारका लागि प्रस्तावित राजदूत रमेश चन्द्र पौडेलले आफ्नो कार्ययोजना प्रस्तुत गर्नु भएको छ । आज सिहंदरबारमा बसेको समितिको बैठकमा प्रस्तावित राजदूतपौडेलले आफ्नो कार्ययोजना प्रस्तुत गर्नु भएको हो ।

आफ्नो कार्ययोजना प्रस्तुत गर्दै उहाँले कतारमा कामदारहरुले मात्र काम गर्न पाउने अनुमति भएको भन्दै विभिन्न क्षेत्रका प्राविधिक, चिकित्सक, व्यवस्थापक, सूचना प्रविधि विज्ञलगायतलाई सेवा प्रवेश गर्न पाउने प्रावधानका लागि पहल गरिने प्रतिबद्धता जनाउनुभयो । उहाँले भन्नुभयो, ‘कतारमा श्रमिक कामदारहरुलाई मात्र काम गर्न पाउने अनुमति भएकोमा विभिन्न क्षेत्रका प्राविधिक, चिकित्सक, व्यवस्थापक, सूचना प्रविधि विज्ञ, आर्किटेक आदिलाई सेवाप्रवेश गर्न पाउने प्रावधानका लागि पहल गरिने छ ।’

यस्तै, उहाँले कतारमा कार्यरत श्रमिकहरुले प्राप्त गर्ने पारिश्रमिक वापतको विदेशी मुद्राको अपचलन भए नभएको र कामदार ठगीमा परे नपरेको यकिन गर्ने र हुने गरेको रहेछ भने नियन्त्रण गर्न पहल गर्ने पनि प्रतिबद्धता जनाउनुभयो ।

उहाँले भन्नुभयो, ‘कतारमा कार्यरत श्रमिकहरुले प्राप्त गर्ने पारिश्रमिक वापतको विदेशी मुद्राको अपचलन भए नभएको र कामदार ठगीमा परे नपरेको यकिन गर्ने, हुने गरेको रहेछ भने नियंत्रण गर्न पहल गर्ने र बैंकिङ् च्यानल प्रयोग गर्न प्रोत्साहित गर्ने । साथै रकम पठाउन लाग्ने दस्तुर कम गर्न पहल गर्ने ।’

उहाँले कतारमा रहेका नेपाली श्रमिकहरूको हित संरक्षण तथा प्रवर्द्धनमा जोड दिएर काम गर्ने पनि बताउनुभयो । साथै, नेपाल–कतार कूटनीतिक सम्बन्ध विस्तार गर्दै सरकारको परराष्ट्र नीति र अख्तियारीको दायराभित्र रहेर नियोगलाई प्राप्त हुने भौतिक श्रोत साधनको अधिकतम सदुपयोग गरी द्विपक्षीय सम्बन्धलाई थप विस्तार, सुदृढ गर्न भूमिका खेल्ने पनि जानकारी दिनुभयो ।