काठमाडौं, ८ वैशाख । अमेरिकाको मेरिल्याण्डस्थित ग्रीनबेल्टको पार्कमा गोली चलेको छ ।
विद्यालयका बालबालिकाहरुको बाक्लो जमघट भएका बेला गोली चल्दा ५ जना घाइते भएका छन् भने घाइते मध्ये एकको अवस्था गम्भीर रहेको प्रहरीले जनाएको छ ।
गोली लागेर घाइते हुनेहरुमा १६ देखि १८ वर्ष उमेर समूहका विद्यार्थी रहेको अमेरिकन सञ्चारमाध्यमहरुले जनाएका छन् ।
गोली चल्दाको समय ग्रीनबेल्ट पार्कमा उच्च माध्यमिक विद्यालयका सयौं विद्यार्थीहरुको उपस्थिति रहेको थियो ।
ग्रीनबेल्टका प्रहरी प्रमुख रिचर्ड बोबर्सले एक जना घाइतेको अवस्था गम्भीर रहेको र अर्काको अवस्था स्थिर रहेको पत्रकार सम्मेलन गरेर जानकारी गराउनुभएको छ ।
घाइते पाँचै जनालाई स्थानीय अस्पतालमा उपचार भइरहेको छ । घटनामा संलग्न एक जनाको खोजी कार्य जारी रहेको पनि पत्रकार सम्मेलनमार्फत बोबर्सले बताउनुभयो ।
प्रतिक्रिया
सम्बन्धित
सिफारिस