युक्रेनी प्रधानमन्त्रीको दाबी- युक्रेनले रुससँग हार्‍यो भने तेस्रो विश्वयुद्ध हुन्छ

दैनिक नेपाल २०८१ वैशाख ६ गते ११:३२

काठमाडौं, ६ वैशाख । युक्रेनका प्रधानमन्त्री डेनिस स्मिहलले युक्रेनले रुससँग हार्‍यो भने विश्वले तेस्रो विश्वयुद्धको सामना गर्नुपर्ने दाबी गर्नुभएको छ ।

डेनिसले अमेरिकी कांग्रेसलाई विदेशी राहत विधेयक पारित गर्न माग गर्नुभएको छ । युक्रेनलाई राहत प्याकेज दिने विषयमा अमेरिकी संसदमा शनिबार मतदान हुँदैछ ।

उनले भने, ‘यदि हामी बचेनौँ भने, युक्रेनले हार्नेछ ।’ यसले गर्दा अन्तर्राष्ट्रिय सुरक्षाको सम्पूर्ण प्रणाली ध्वस्त हुनेछ । विश्वलाई सुरक्षाको लागि नयाँ प्रणाली चाहिन्छ । त्यसो भए नयाँ तनाव उत्पन्न हुन सक्छ । यस्ता धेरै युद्धहरू देख्न सकिन्छ । यो विषय तेस्रो विश्वयुद्धतिर जान सक्छ ।’

तर, युक्रेनले पराजयको अवस्थामा यस्तो चेतावनी दिएको यो पहिलो पटक भने होइन । गत वर्ष युक्रेनी राष्ट्रपति जेलेन्स्कीले तेस्रो विश्वयुद्ध सुरु गर्न रुसले पोल्याण्डमा आक्रमण गर्न सक्ने दाबी गर्नुभएको थियो । तर त्यस्ता दाबीलाई रुसले अस्वीकार गरेको छ ।

रुसी राष्ट्रपति भ्लादिमिर पुटिनले गत महिना पूर्वी युरोपमा आक्रमण गर्ने रुसको दाबीलाई ‘पूर्ण बकवास’ भन्नुभएको थियो ।