एलन मस्क भारत आउँदै, टेस्लाको प्लान्ट खोल्न सक्ने

दैनिक नेपाल २०८० चैत २९ गते १०:२२

नयाँदिल्ली, २९ चैत । इलेक्ट्रिक भेहिकल (इभी) उत्पादन गर्ने कम्पनी टेस्लाका मालिक एलोन मस्क यसै महिना भारत भ्रमणमा आउनुहुने भएको छ ।

समाचार एजेन्सी रोयटर्सले स्रोतलाई उद्धृत गर्दै उहाँको भ्रमण अप्रिल २२ देखि २७ सम्म हुनसक्ने बताएको छ । मस्कले एक्स पोस्टमा लेख्नुभएको छ– प्रधानमन्त्री मोदीलाई भेट्न आतुर छु ।

यो उहाँको पहिलो भारत भ्रमण हुनेछ । यस समयमा मस्कले भारतमा टेस्लाको उत्पादन कारखानाको घोषणा गर्न सक्नुहुन्छ ।

मोदी र मस्कबीच अहिलेसम्म दुईपटक भेट भइसकेको छ । ‘हामीले २०१५ मा क्यालिफोर्नियाको टेस्ला कारखानामा भेट्यौं ।’ मस्कले भन्नुभएको छ । यसपछि दुवैको भेट सन् २०२३ को जुनमा न्यूयोर्कमा भएको थियो ।

मस्कले यस हप्ता एक्समा भन्नुभएको थियो कि भारतमा अन्य देशहरू जस्तै इलेक्ट्रिक कारहरू हुनुपर्छ । भारतमा टेस्ला विद्युतीय सवारी साधन उपलब्ध गराउनु स्वाभाविक प्रगति हो ।

यहाँ चुनाव हुन लागेको बेला मस्क भारत आउन लाग्नुभएको हो । उही समयमा अमेरिकी र चिनियाँ बजारमा इभीको माग भने सुस्त भएको छ । टेस्लाले पनि चिनियाँ गाडीसँग प्रतिस्पर्धा गरिरहेको छ ।

टेस्लाले २०२२ मा नै भारत आउने इच्छा व्यक्त गरे पनि कम्पनी र सरकारबीच वार्ता हुन सकेको भने थिएन । टेस्लाले पूर्ण रूपमा एसेम्बल भएका सवारी साधनमा आयात शुल्क १०० प्रतिशतबाट घटाएर ४० प्रतिशतमा झार्न सरकारसँग माग गरेको थियो ।

कम्पनीले आफ्ना सवारी साधनलाई विलासी नभई विद्युतीय सवारी साधनको रुपमा हेर्न चाहेको भए पनि सरकारले अन्य मुलुकबाट आयात हुने विद्युतीय सवारी साधनको आयात शुल्क मिनाहा गर्ने वा घटाउने मनसाय नरहेको बताएको थियो ।