३० कार्तिक २०८३, सोमबार

राष्ट्रपतिले नयाँ सरकार गठनका लागि आह्वान गरेको समय आज सकिँदै, गठबन्धनको बैठक बस्दै

224
Shares

फन्ट परिवर्तन गर्नुहोस:

  • change font
  • change font
  • change font

काठमाडौं, १० पुस । राष्ट्रपति विद्यादेवी भण्डारीले आगामी नयाँ सरकार गठनका लागि आह्वान गरेको एक साताको समय आज सकिँदै छ ।

गत मंसिर ४ गते सम्पन्न प्रतिनिधिसभा र प्रदेशसभा सदस्यको निर्वाचनपछि नयाँ सरकार गठन गर्न राष्ट्रपतिले यही पुस ३ गते एक साताको समय निर्धारण गरी आह्वान गरेकी थिइन् ।

निर्वाचनमा कुनै पनि दलले स्पष्ट बहुमत प्राप्त गरेको नदेखिएकाले राष्ट्रपतिले नेपालको संविधानको धारा ७६ को उपधारा (२) बमोजिम प्रतिनिधिसभामा प्रतिनिधित्व गर्ने दुई वा दुईभन्दा बढी दलहरूको समर्थनमा बहुमतप्राप्त गर्न सक्ने प्रतिनिधिसभाको सदस्यलाई प्रधानमन्त्री नियुक्त गर्नका लागि पुस १० गते साँझ ५ बजेभित्र दाबी पेस गर्न आह्वान गरेकी थिइन् ।

पाँचदलीय सत्तागठबन्धन दलहरूले गठबन्धनकै नेतृत्वमा आगामी नयाँ सरकार गठन गर्ने प्रयासमा जुटिरहेका छन् ।

गठबन्धनको नेपाली कांग्रेस, नेकपा माओवादी केन्द्र, नेकपा एकीकृत समाजवादी, राष्ट्रिय जनमोर्चालगायत दलका शीर्षनेताहरूले छलफल र बैठक जारी राखेका छन् ।

शनिबार पनि पाँचदलीय गठबन्धनका शीर्षनेताहरूको बैठक बसेका थिए । तर बैठकमा कांग्रेस र माओवादीले पहिलो कार्यकालको सरकार आफ्नै नेतृत्वमा बन्नुपर्ने दाबी गरेपछि सहमति हुन सकेन ।

आज पनि गठबन्धनको बैठक प्रधानमन्त्री निवास बालुवाटारमा बिहान १० बजे बस्दैछ ।