लालपुर्जा देखाएर पनि मतदान गर्न पाइने

काठमाडौं, २२ कात्तिक । मंसिर ४ गते आइतबार हुने प्रतिनिधि सभा तथा प्रदेश सभा सदस्य निर्वाचनमा मतदाताले आफ्नो जग्गाधनी पुर्जा वा परिचय खुल्ने आधिकारिक कागजात देखाएर मतदान गर्न पाउने भएका छन् ।

आयोगबाट प्रकाशित अन्तिम मतदाता नामावलीमा नाम समावेश भएका मतदाताले आयोगबाट जारी भएको मतदाता परिचयपत्र वा नेपाली नागरिकताको प्रमाणपत्र वा राष्ट्रिय परिचयपत्र वा राहदानी वा जग्गाधनी प्रमाणपुर्जा वा सवारीचालक अनुमतिपत्रको सक्कल प्रमाणका आधारमा मतदान गर्न पाइने भएको हो ।

अन्तिम मतदाता नामावली विवरणसँग भिडाई यकिन गरी मतदान गर्न पाउने व्यवस्था मिलाउन सम्बन्धित निर्वाचन अधिकृतलाई निर्देशन दिने निर्णय गरेको निर्वाचन आयोगले जनाएको छ ।

निर्वाचनको सन्दर्भमा आयोगबाट मतदातालाई परिचयपत्र वितरण भएको भए पनि कतिपय मतदाताको परिचयपत्र हराएको वा नासिएको अवस्था भएमा उल्लेखित परिचयपत्रको आधारमा मतदान गर्न पाउने व्यवस्था मिलाइएको हो ।