सीमित नेताहरूले राज्य सत्ता कब्जा गरी सर्वसत्तावाद लादे : कमल थापा

दैनिक नेपाल २०७९ असार १४ गते ७:२५

काठमाडौं, १४ असार । राप्रपा नेपालका अध्यक्ष कमल थापाले केही सीमित राजनीतिक दलका सीमित नेताहरुले राज्य सत्ता कब्जा गरेर सर्वसत्तावाद लाद्ने काम भएको बताएका छन् ।

हिजो सोमबार काठमाडौंमा आयोजित प्रदेशस्तरीय स्वयंसेवक प्रशिक्षण कार्यक्रमलाई सम्बोधन गर्दै अध्यक्ष थापाले राष्ट्रियता अत्यन्त कमजोर हुँदै गइरहेको, विदेशीहरुको चलखेल र प्रभाव तीव्र रुपले बढेको भन्दै बाह्य शक्तिहरुको रणनीतिक प्रतिस्पर्धा स्थल बन्न सक्ने खतरा भएको समेत बताएका छन् ।

आमुल परिवर्तनको नारा लिएर जनतालाई मालिक बनाउने, आर्थिक विकास र समृद्धि हासिल गर्ने उद्देश्य लिएर शुरु भएको यात्रा १६ वर्ष पछाडि ठिक विपरित गन्तव्यमा पुगेको बताउँदै अध्यक्ष थापाले जनता बलियो हुनुको सट्टा, प्रजातन्त्र सुदृढ हुनुको सट्टा ठीक उल्टो भइरहेको बताएका छन् ।

कार्यक्रममा अध्यक्ष थापाले आगामी निर्वाचनमा राष्ट्रिय पार्टी बनाउन आवश्यक मेहनत, संवाद गर्न संकोच र हिन भावनाबाट मुक्त भई अगाडि बढ्न बागमति प्रदेशका नेता कार्यकताहरुलाई निर्देशन दिएका छन् ।

कार्यक्रममा बागमति प्रदेशका अध्यक्ष माधव खत्रीले सिकेका, बुझेका कुराहरुलाई जनता समक्ष पुर्याउन हामी सवै जुट्नु पर्ने बताए भने प्रशिक्षण विभागका प्रमुख एवम् महामन्त्री सुशील कुमार श्रेष्ठले आगामी निर्वाचनलाई दृष्टिगत गरि पाँच सय स्वयंसेवक तयारी पालिकाहरूमा खटाक्ष्ने बताए ।

प्रशिक्षण कार्यक्रममा पार्टीका अध्यक्ष कमल थापाले राप्रपा नेपाल किन ?, उपाध्यक्ष डा. बिष्णु भण्डारीले नेपाललाई सनातन हिन्दुराष्ट्र किन नबनाउने ?, प्रवक्ता सुरेश आचार्यले राजनीतिक तथा सामाजिक परिचालन र केन्द्रीय सदस्य एवम् प्रशिक्षण बिभागका सदस्य जीवन सुनुवारले नेतृत्व विकाससम्बन्धी तालिम दिएका थिए ।

तालिममा बागमति प्रदेशका १७५ जनाको सहभागिता थियो ।