आज यी स्थानमा भारी वर्षा हुन सक्ने, आइतबारदेखि पुनः मनसुन सक्रिय हुने

काठमाडौँ, १९ भदौ । मौसम पूर्वानुमान महाशाखाले आज देशका धेरै स्थानमा वर्षाको सम्भावना रहेको जनाएको छ ।

महाशाखाले देशभर मनसुनी वायुको प्रभावका कारण शनिबार दिउँसो देशभर सामान्य बदली रही धेरै स्थानहरुमा हल्कादेखि मध्यम वर्षाको सम्भावना रहेको जनाएको छ ।

महाशाखाका अनुसार प्रदेश १ र गण्डकी प्रदेशका एक वा दुई स्थानमा भने मेघ गर्जन र चट्याङसहित भारी वर्षाको सम्भावना रहेको छ ।

यस्तै, आज राती प्रदेश २ र गण्डकी प्रदेशका एक वा दुई स्थानमा मेघ गर्जन र चट्याङसहित भारी वर्षाको सम्भावना रहेको महाशाखाले जानकारी दिएको छ ।

त्यस्तै, आइतबारदेखि पुनः नेपालमा मनसुन सक्रिय हुने महाशाखाले जनाएको छ ।

जल तथा मौसम विज्ञान विभागको मौसम पूर्वानुमान महाशाखाका अनुसार मनसुनी न्यूनचापीय रेखा अहिले नेपालको तराईभन्दा थोरै पर रहेको छ । त्यो रेखा नजिक आइ पुग्नासाथ मनसुनको सक्रियता बढ्ने छ ।