काठमाडौँ, २३ चैत । नेपाल राष्ट्र बैंककी निर्देशक सुष्मा रेग्मी(रिजाल) ठगी आरोपमा पक्राउ परेकी छन् ।
आफ्नै ८५ वर्षीया आमालाई ३ करोड रुपैयाँ ठगी गरेको आरोपमा उनी पक्राउ परेकी हुन् ।
महानगरीय प्रहरी परिसर काठमाडौँको टोलीले राष्ट्र बैंकको कर्पोरेट प्लानिङ तथा रिस्क म्यानेजमेन्ट विभागकी निर्देशक रेग्मीलाई पक्राउ गरेको हो ।
प्रहरीका अनुसार सुष्माकी आमाले आफूलाई ठगेको भन्दै छोरीविरुद्ध उजुरी दिएकी थिइन् ।
वृद्धाकै उजुरीका आधारमा रेग्मीलाई दुई दिनदेखि थुनामा राखिएको प्रहरीले जनाएको छ ।
आफ्नी आमाको विभिन्न बैंकमा रहेका पैसासहित ३ करोडभन्दा बढी सम्पत्ति रेग्मीले आफूले नियन्त्रणमा लिएको आरोप छ ।
सम्पत्ति लिएको तर आफ्नो हेरचाह गर्ने भनेको तर पैसा लिएपछि बेवास्ता गरेकाले आमाले उजुरी दिएकी हुन् ।
प्रहरीले रेग्मीलाई ८ महिनादेखि नै आमाको राम्रोसँग हेरविचार वा पैसा फिर्ता गरिदिन आग्रह गरेपनि उनले नमानेको बताइएको छ ।
रेग्मीविरुद्ध जेष्ठ नागरिक ऐन २०७३ अनुसार मुद्दा दर्ता भइ अनुसन्धान भइरहेको प्रहरी परिसरले जनाएको छ ।
वृद्धा आमाले यसरी आफ्नै छोरीविरुद्ध मुद्दा दुर्लभ घटना हो ।
प्रतिक्रिया