काठमाडौं, १८ असोज । आज अपराह्न ४ बजे बस्ने भनिएको सत्तारुढ दल नेपाल कम्युनिस्ट पार्टी (नेकपा) को सचिवालय बैठक अनिश्चित भएको छ ।
प्रधानमन्त्री एवं नेकपाका अध्यक्ष केपी शर्मा ओलीको निजी सचिवालयका सदस्यहरुलाई शनिबार कोरोना संक्रमण पुष्टि भएपछि बैठक बस्ने वा नबस्ने अनिश्चित भएको हो ।
‘यद्यपि, पार्टीले के निर्णय लिन्छ त्यो स्पष्ट भइसकेको छैन । संक्रमणको त्रासमा बैठक बस्नु भन्दा एक–दुई दिन पछि बस्दा राम्रो हुने सचिवालयका एक सदस्यले बताएका छन् ।
त्यसो त प्रधानमन्त्री केपी शर्मा ओलीले पनि अत्यावश्यक बाहेकको भेटघाट नगर्ने बताइसकेका छन् । यसले पनि सचिवालय बैठक बस्ने सम्भावना क्षीण भएको छ ।
प्रधानमन्त्री केपी शर्मा ओलीका सचिवालयका ४ जनामा कोरोनाभाइरस संक्रमण पुष्टि भएको छ ।
संक्रमित हुनेहरुमा राजनीतिक सल्लाहकार विष्णु रिमाल, विदेश मामिला सल्लाहकार राजन भट्टराई, प्रेस सल्लाहकार सूर्य थापा र प्रमुख स्वकीय सचिव इन्द्र भण्डारी रहेका छन् ।
शुक्रबार स्वाब संकलन गरिएकोमा उनीहरुको रिपोर्ट कोरोना पोजेटिभ आएको हो । चालकदेखि सबैको परीक्षण गरिएकोमा सचिवालयका ४ जनामा संक्रमण देखिएको बालुवाटार स्रोतले जनाएको छ ।
यस पटक प्रधानमन्त्री ओलीको परीक्षण नगरिएको अब भने उनको पनि परीक्षण गरिने जनाइएको छ ।
प्रतिक्रिया