रौतहटमा प्रहरी र स्थानीयबीच झडप हुँदा १४ राउण्ड हवाई फायर, ४ प्रहरी घाइते

काठमाडौँ, २९ साउन । रौतहटमा प्रहरी र स्थानीयबीच झडप हुँदा ४ जना प्रहरी घाइते भएका छन् ।

बिहीबार दिउँसो राजपुर नगरपालिका ६ स्थित कुडियामा भारतबाट अवैध भैँसी ल्याइरहेको भन्ने सूचनाका आधारमा प्रहरी खटिएका थिए ।

जिल्ला तथा स्थानीय प्रहरीको टोलीमाथि करिब ५ सयको संख्याका स्थानीयले ढुंगामुढा गर्न थालेपछि प्रहरीले १४ राउण्ड हवाई फायर गरेको थियो ।

प्रहरीका अनुसार ड्युटीमा खटिएका प्रहरीमाथि स्थानीयले आक्रमण गरेपछि १४ राउण्ड हवाई फायर र भीडलाई तितरबितर पार्न ८ राउण्ड अश्रु ग्यास प्रहार भएको थियो ।

घटनामा कुनै अवैध भैँसी फेला नपरेको र कोही पनि पक्राउ नपरेका प्रहरीले जनाएको छ ।