काठमाडौँ, १२ साउन । सत्तारुढ नेकपाका सचिवालय सदस्य एवम् उपप्रधानमन्त्री ईश्वर पोखरेलले पार्टीको महाधिवेशनको तयारीमा लाग्न आह्वान गरेका छन् ।
सामाजिक सञ्जाल फेसबुकमार्फत पोखरेलले राष्ट्रिय आवश्यकताद्वारा निर्देशित भएर पार्टी एकता गरेको बताउँदै ऐतिहासिक एकताका लागि महाधिवेशनको तयारीमा लाग्न अपील गरेका हुन् ।
उनले पार्टी एकता गर्दा बाँकी रहेका विचार, संगठन र नेतृत्वलाई व्यवस्थित र एकिकृत गर्न राष्ट्रिय मञ्च अर्थात महाधिवेशनको तयारीमा लाग्न अनुरोध गरेका हुन् ।
पोखरेलले स्थायी कमिटीले सवर्मसम्मतिले तय गरेको महाधिवेशनको मिति पनि नबिर्सन आग्रह गरेका छन् ।
पोखरेलले फेसबुकमा लेखेको स्टाटस :
“राष्ट्रिय आवश्यकताद्वारा निर्देशित भएर हामीले पार्टी एकता गर्यौं ! त्यो ऐतिहासिक एकता गर्दा पुरा गर्न बाँकी रहेका विचार, संगठन र नेतृत्वलाई व्यवस्थित र एकिकृत गर्न राष्ट्रिय मञ्च अर्थात् महाधिवेशनको तयारीमा लागौं !! केन्द्रीय कमिटीले सर्वसम्मतीले महाधिवेशनका लागि तय गरेको मितिलाई नबिर्सौं !!”