काठमाडौँ, ११ साउन । उपप्रधानमन्त्री तथा रक्षामन्त्री इश्वर पोखरेलसँग नेपालका लागि अमेरिकी राजदूत रेण्डी बेरीले भेटवार्ता गरेका छन् ।
भेटमा राजदूत रेण्डी बेरीले अमेरिकी सहयोग परियोजना मिलेनियम च्यालेञ्ज कर्पोरेशन (एमसिसी) का विषयमा नेपाल सरकारसँग प्रगती विवरणबारे चासो लिएका छन् ।
राजदूत बेरीले आइतबार उपप्रधानमन्त्री तथा रक्षामन्त्री इश्वर पोखरेललाई भेटेर एमसीसीबारे नेपाल सरकारले गरिरहेको कामको चासो लिएका हुन् ।
एमसीसीबारे सत्तारुढ नेकपाकै नेताहरुमा एक मत नभएको बेला राजदूत बेरीले यस विषयमा चासो राखेका छन् ।
गत जेठ १६ गते संसदबाट पारित गरिसक्नु पर्ने भएपनि पारित हुन नसकेपछि नेपालले गरेको आन्तरिक तयारी बारे राजदूत बेरीले उपप्रधानमन्त्रीलाई भेटेर यसबारे जानकारी लिएका हुन् ।
भेटमा बेरीले विश्वका अन्य देशहरुबाट एमसिसी सहयोग माग भइरहेको सन्दर्भमा नेपालले किन ढिला गरिरहेको छ भन्दै चासो राखेको रक्षामन्त्रालयका सहसचिव सन्तबहादुर सुनारले बताए ।
रक्षामन्त्री पोखरेलले सरकार अझै छलफलमा रहेकाले अनुमोदन गर्न ढिला भएको स्वीकार गरेका थिए ।
भेटमा बेरीले छिमेकी भारतमा एक दिनमा लाख बढी जनतामा कोरोना पोजेटिभ देखिएको सन्दर्भमा नेपालले बनाएको योजना बारे पनि चासो राखेका थिए ।
अमेरिकाले सुरुमा केही कमजोरी गरेका कारण अहिले समस्या बढेर गएको उल्लेख गर्दै बेरीले संक्रमण नियन्त्रण गर्दै आर्थिक गतिविधि सञ्चालनका लागि सावधानी अपनाउन आग्रह गरेका थिए ।