तौलिहवा, १९ वैशाख । कपिलवस्तु जिल्लाको यशोधरा गाँउपालिका वडा नम्बर ८ का वडाध्यक्ष सहाबुद्दिन मुसलमानलाई अपरिचित व्यक्तिले गोली हानेको छ ।
शुक्रबार बिहान करीव १ बजे वडा नम्बर ८ को खोरिया गाँउमा आफ्नै घरमा सुतिरहेका वडाध्यक्ष मुसलमानमाथि चार राउण्ड गोली प्रहार भएको हो ।
दुई जनाको समूहमा आएका अपरिचित व्यक्तिले रिवाल्वरले मुसलमानमाथि गोली प्रहार गरेको प्रहरीले जनाएको छ ।
वडाध्यक्ष मुसलमानलाई प्रहार भएका कुनै पनि गोली लागेको छैन ।
गोली प्रहारको घटनामा संलग्नता रहेको आशंकामा प्रहरीले एक जनालाई नियन्त्रणमा लिएको छ ।
जिल्ला प्रहरी कार्यालय कपिलवस्तुका प्रहरी नायब उपरीक्षक सुनिल मल्लले गोली प्रहारको घटनाको अनुसन्धान भइरहेको जानकारी दिएका छन् ।
प्रतिक्रिया