काठमाडौं, २४ चैत । विश्वव्यापी महामारीको रुपमा फैलिएको कोरोना भाइरस मानिसबाट जनावरमासमेत सरेको पुष्टि भएको छ । अमेरिकाको न्यूयोर्कमा मानिसबाट सरेको कोरोना भाइरसले पहिलो पटक एउटा बाघ विरामी परेको छ ।
ब्रोंक्स चिडियाखानाका प्रमुख भेटेनेरियनले आइतबार एउटा बाघलाई कोभिड–१९ भएको जानकारी दिएका हुन् । सो चिडियाखानामा रहेको चार वर्षे नादिया नाम गरेको मलायान बाघमा कोरोना भाइरस परीक्षणको रिपोर्ट पोजेटिभ आएको हो ।
नादियासहित चिडियाखानाका अरु तीन बाघ र तीन सिंहमा सुख्खा खोकी लागिरहेपछि सबैभन्दा बढी बिरामी नादियाको कोरोनाको परीक्षण गर्दा संक्रमण देखिएको हो ।
कोभिड–१९ भाइरस जनावरबाट मानिसमा सरेको अनुमान गरिदैं आएकोमा यसअघि हंगकंगका केही जनावरको परीक्षण गर्दा पनि ‘पोजेटिभ’ देखिएको थियो । चिडियाखानाका कुन कर्मचारीबाट नादियालाई संक्रमण भएको हो भन्ने पत्ता लागेको छैन ।