बैतडी, १७ पुस । मौसममा आएको परिवर्तनसँगै बैतडीका उच्च लेकाली भेगमा हिमपात भएको छ ।
खोड्पे, श्रीभावर, ढोल्यामोड, सिगासधुरालगायतका क्षेत्रमा बिहीबार फेरि हिमपात भएको हो ।
यस वर्ष मंसिरको अन्तिम साता पहिलोपटक हिमपात भएकोे थियो ।
बुधबार रातिदेखि उच्च क्षेत्रमा हिमपात भएको स्थानीय बासिन्दाले जनाएका छन् ।
हिमपातका कारण बढेको चिसोले जनजीवन प्रभावित भएको खोड्पेका स्थानीय मोहन विष्टले बताए ।
हिमपातले बाहिर निस्कनसमेत मुस्किल भएको सूर्नया गाउँपालिका–८ का वीरबहादुर बोहराले जानकारी दिए ।
हिमपातले चिसो बढेसँगै वस्तुभाउ स्याहारमासमेत समस्या भएको स्थानीयले बताएका छन् ।
सिँचाइ नभएका क्षेत्रमा वर्षा र हिमपातले सिँचाइको काम गर्ने भएकाले किसान खुसी भएका छन् ।
हिमपातले विभिन्न रोगकीरासमेत नस्ट हुने कृषि ज्ञान केन्द्रका निमित्त प्रमुख कर्णबहादुर चन्दले जानकारी दिए ।
प्रमुख जिल्ला अधिकारी आनन्द पौडेलले लेकाली भेगका ठाउँमा चिसोबाट बच्न सतर्कता अपनाउन सूचना जारी गरी र औषधि आपूर्तिका लागि स्थानीय तहलाई निर्देशन दिइसकेको बताए ।
बैतडीमा विद्युत् सेवा अवरुद्ध भएको छ ।
राति चलेको हावाहुरीले बैतडीको खोड्पे क्षेत्रमा लाइनमा समस्या आएको नेपाल विद्युत् प्राधिकरण बैतडीले जनाएको छ ।
विद्युत सेवा अवरुद्ध हुँदा सेवाग्राही मारमा परेका छन् । रासस