अविरल वर्षाको कारण बाढी तथा डुवानमा परेकाहरुको सशस्त्र टोलीद्धारा उद्वार

काठमाडौं, २८ असार । अविरल वर्षाको कारण विभिन्न स्थानमा आएको बाढी तथा डुवानमा परेकाहरुलाई सशस्त्र प्रहरीको टोलीले उद्वार गरेको छ ।

सुनसरी जिल्लाको वर्यु गाउपालिका ३ स्थित फारम चोक र डर्मीचोक ईलाकामा अविरल वर्षाको कारण केसल्लीया खोलामा पानीको बहाव बढ्न गई करीव एक सय २० घर डुवानमा परेकामा सो ईलाकाबाट सशस्त्र प्रहरी बल, नेपाल बोर्डर आउट पोष्ट अमडुवाबाट खटिएको एपीएफ टोलीले पीडितहरुलाई सुरक्षित स्थानमा सारेको छ ।

यसैगरी रौतहट जिल्लाको कटहरिया नगरपालिकाको बकैया नदीमा पानीको बहाव बढ्न गई बाध कटान गरी बस्तीमा बाढी पसेपछि करीव ३० घर डुवानमा परेकोमा सशस्त्र प्रहरी बल, नेपाल सुरक्षा वेश दुधियाभारबाट सशस्त्र प्रहरी निरीक्षक ओमप्रसाद ढकालको कमाण्डमा खटिएको एपीएफ टोली तथा स्थानीय वासिन्दाले त्यसठाउँबाट घरायसी सामानहरु सुरक्षित स्थानमा सारेको छ ।

यसैगरी रौतहट जिल्लाकै राजपुर नगरपालिकाको वडा नं. १ र २ ईलाकामा अविरल वर्षाका कारण फसेका एक जना महिला र दुई जना पुरुष व्यक्तिहरुलाई सशस्त्र प्रहरी बल, नेपाल सुरक्षा वेश फतुवाबाट खटिएको सशस्त्र प्रहरी निरीक्षक तुलाबहादुर चौधरीको कमाण्डमाको एपीएफ टोलीले सकुशल उद्वार गरेको छ ।

यसैगरी रौतहट नगरपालिका ९ स्थित सिर्सियाबाट वर्षाका कारण फुसको घरभित्र फसेका ९ जनाको सशस्त्र प्रहरी बल, नेपाल नम्बर ९ गण हेक्वा रौतहटबाट सशस्त्र प्रहरी नायव उपरीक्षक डिल्लीकुमार कार्कीको कमाण्डमा खटिएको एपीएफ टोलीले सकुशल उद्वार गरेको छ । यसैगरी पर्सा जिल्लाको बिरगंज महानगरपालिका ३१ बेलवा स्थित मुसहर बस्तीमा सोही स्थानमा रहेको भेडाहार खोलामा पानीको बहाव बढ्न गई करीव २५ घर डुवान परेकोमा सशस्त्र प्रहरी बल, नेपाल सुरक्षा वेश बेलवाबाट सशस्त्र प्रहरी निरीक्षक दिपनरसिंह राईको कमाण्डमा खटिएको एपीएफ टोलीले पीडितहरुलाई उद्वार गरी सुरक्षित स्थानमा सारेको छ ।

यसैगरी पर्सा जिल्लाकै छपरमाई गाउँपालिका ३ सानोजय मंगलापुर स्थित एक घरमा वर्षाको कारण डुवानमा परेका ५५ वर्षिय साहेब साह, ४० वर्षिया सुमित्रा देवी र १५ वर्षिकी लक्ष्मीकुमारी साहलाई सशस्त्र प्रहरी बल, नेपाल बोर्डर आउट पोष्ट भिस्वाबाट सशस्त्र प्रहरी नायव निरीक्षक निलहरी दाहालको कमाण्डमा खटिएको एपीएफ टोलीले सकूशल उद्वार गरेको छ ।

यसैगरी चितवन जिल्लाको राप्ती नगरपालिका ६ डुम्रे पुल नजिकै रहेको शम्शेर चेपाङ्गको घर वर्षाको कारण डुवानमा परेको भन्ने जानकारी प्राप्त हुनासाथै सशस्त्र प्रहरी बल, नेपाल नम्बर ३ गढीमाई बाहिनी मुख्यालय मकवानपुरबाट सशस्त्र प्रहरी निरीक्षक मनिष थापाको कमाण्डमा खटिएको विपद  व्यावस्थापन तालिम प्राप्त दक्ष जनशक्तिसहितको टोलीले निजको श्रीमती तथा तीन जना बालबालिकाहरुलाई सकूशल उद्वार गरी सुरक्षित स्थानमा ल्याएको छ ।

यसैगरी पाल्पा जिल्लाको तीनाउ गाउँपालिका ३ स्थित सिद्धार्थ लोकमार्गमा पहिरो गई मोटरसाईकलसहित पुरिएका एक व्यक्तिको शव सशस्त्र प्रहरी बल, नेपाल नम्बर ४१ गुल्म हेक्वा रुपन्देही र स्थानीय प्रहरीले उद्वारगरी बाहिर निकालेको छ । सोही जिल्लाको ढिस्डी गाउँपालिका ४ मितयाल बस्ने अन्दाजी ३० वर्षीय धनबहादुर सुनारी एक्कासी आएको पहिरोको कारण त्यसठाउँमा लु ५० प. ४६७१ नम्बरको मोटरसाईकलसहित पुरिएका थिए ।

अविरल वर्षाको कारण देशका विभिन्न भागहरुमा बाढि तथा डुवान भएपछि एपीएफ टोली सकृयताकासाथ उद्वार कार्यमा जुटेको छ ।

कमला नदिमा दुई दिनदेखि बाढीमा फसेकालाई उद्वार 

कमला नदिको झण्डै बीच भागमा बाढिले घेरिएर दुई दिनदेखि बाहिर निस्कन नसकेका पाँच जनालाई एपीएफ टोलीले आज विहान उद्वार गरी नदिबाट बाहिर निकालेको छ । धनुषा जिल्लाको सहिद नगरपालिका २ स्थित मद्रास भन्ने ठाउँमा ठूलो बाढि आएको सो नदि किनारबाट करिव पाँच सय मिटर भित्रबाट उनीहरुलाई सशस्त्र प्रहरी बल, नेपाल नम्बर २ छिन्नमस्ता बाहिनी मुख्यालय महोत्तरीबाट खटिएको विपद व्यवस्थापन तालिम प्राप्त दक्ष जनशक्तिले सकूशल उद्वार गरेको हो ।

उद्वार गरिएकाहरुमा एक जना महिला तथा चार जना पुरुष रहेका छन् । यसैगरी धनुषा जिल्लाकै कमलामाई नगरपालिका स्थित हसमोडा सखला भन्ने ठाउँबाट दुई महिलासहित चार जनालाई सोही बाहिनीबाट खटिएको एपीएफ टोलीले उद्वार गरेको छ । यसैगरी एपीएफ टोलीले मोरङ जिल्लामा ४५ घर परिवारलाई उद्वार गरी सुरक्षित स्थान सारेको छ भने झापामा ४२ घर परिवारलाई उद्वार गरेको छ । यसैगरी रौतहट जिल्लाको ब्रिन्दावन नगरपालिका १ स्थित चादिखोलाको कासघारीबाट १९ जनालाई एपीएफ टोलीले उद्वार गरेको छ । यसैगरी ललितपुर महानगरपालिका १८ स्थित बाग्मती खोला किनार र नक्खुखोलाको किनारको दोवानबाट एपीएफ टोलीले एक पुरुष व्यक्तिको शव निकालेको छ ।

ती व्यक्तिको हाल नाम, वतन खुल्न सकेको छैन । नक्खु खोलाले बगाएर ल्याएको उक्त शव सशस्त्र प्रहरी बल, नेपाल कारागार सुरक्षा वेश नक्खुबाट खटिएको एपीएफ टोलीले नदिबाट बाहिर निकालेको हो । अविरल वर्षाको कारण विभिन्न ठाउँहरुमा बाढि तथा डुवान परेपछि सशस्त्र प्रहरी बलको टोली उद्वार कार्यमा सकृयताकासाथ जुटेको छ ।