काठमाडौं, ११ बैशाख । तत्कालीन राप्रपा नेपालका केन्द्रीय सदस्य स्व. शशीकला राजभण्डारीको सातौं वार्षिक पुण्य तिथिको अवसरमा स्मृतिसभा गरेर राप्रपाले उनको पार्टीप्रतिको योगदानलाई स्मरण गरेको छ ।
पार्टी केन्द्रीय कार्यालय, शशीकला स्मृति भवन धुम्बाराहीमा स्मृतिसभा गरिएको हो । स्व. शशीकला राजभण्डारीले पार्टीलाई पुर्याएको योगदानको चर्चा गदैं पार्टीका वरिष्ठ उपाध्यक्ष बुद्धीमान तामाङले नेपाली सेनामा प्रमुख सेनानीसम्मको पदबाट अवकाश लिएर पनि पार्टीको एजेण्डाप्रति प्रतिबद्ध भई सक्रिय योगदान पु्र्याएकी स्व. राजभण्डारीप्रति श्रद्धासुमन अर्पण गरे ।
स्मृतिसभामा महामन्त्री भास्कर भद्राले स्व. शशीकला राजभण्डारीले राप्रपा नेपालको संगठन कमजोर भएको तत्कालिन अवस्थामा पार्टी विस्तारको लागि अतुलनीय योगदान दिएको चर्चा गर्दै उनलाई पार्टीले सदैव स्मरण गरिरहने बताए ।
स्व. शशीकला राजभण्डारीले पार्टीलाई दिएको योगदानको बारेमा प्रकाश पार्दै पार्टीका उपाध्यक्ष तोरण बहादुर गुरुङ, स्व. शशीकला राजभण्डारीका पति तथा पार्टीका केन्द्रीय सदस्य दिलविकास राजभण्डारी, पार्टीका प्रवक्ताद्वय भुवन पाठक, निलकण्ठ काफ्ले, गण्डकी प्रदेश अध्यक्ष, हेमजंग गुरुङ, सह महामन्त्री एवं राप्रमसंका अध्यक्ष कुन्तिकुमारी शाही, ट्रेड युनियन महासंघ (टुकोन)का अध्यक्ष हिक्मत जंग भण्डारी, पार्टीका काठमाडौं जिल्ला अध्यक्ष नवराज सिंखडा लगायतका नेताहरुले श्रद्धाञ्जली अर्पण गरेका थिए ।
स्व. शशीकला राजभण्डारीका श्रीमान दिलविकास राजभण्डारीले वर्षेनी स्मृतिसभा सञ्चालन गर्नको लागि अक्षयकोष खडा गर्ने प्रतिबद्धता समेत व्यक्त गरे ।
प्रतिक्रिया