काठमाडौं, १० असार । टुटफुटबाट कमजोर बनेको राप्रपाका सबै समूह ढिलोचाँडो एकै ठाउँमा आउने राप्रपाका सहायक महामन्त्री राजाराम बर्तौलाले ठोकुवा गरेका छन् । आइतबार पार्टीको रामेछाप–काठमाडौं सम्पर्क समाजको कार्यक्रममा बोल्दै बर्तौलाले पार्टी फुट्नु ठूलो गल्ती भएको भन्दै अब एक नहुनु अर्को महागल्ती हुने हुँदा एकताको विकल्प नभएको जिकिर गरे ।
उनले एकीकृत पार्टीको महाधिवेशनको जगमा टेकेर एकता हुने स्पष्ट पारे । ‘हामीबिच कुनै सैद्धान्तिक वैचारिक मतभेद छैन, सानातिना प्राविधिक कुराको समाधान खुल्ला छाती र पार्टीको सुदूर भविश्यलाई केन्द्रमा राखेर मिलाइन्छ’ बर्ताैलाले भने ।
कार्यक्रममा केन्द्रीय सदस्य लालध्वज लामाले संगठन सुदृढीकरणलाई महत्वका साथ अगाडि बढाउनु पर्नेमा जोड दिए । तीन नम्बर प्रदेशका सांसद रिता माझीले युवा पुस्तालाई राप्रपामा प्रचुर सम्भावना र अवसर रहेको भन्दै मुलुकको राष्ट्रियता, प्रजातन्त्रको संरक्षणका साथै आर्थिक समृद्धिको निमित्त राप्रपाले लिएको बाटो नै सही भएको दाबी गरिन् ।
कार्यक्रममा अर्का केन्द्रीय सदस्य एवं प्रवास विभाग प्रमुख विजय खड्काले सैद्धान्तिक र वैचारिक रुपमा प्रतिबद्ध कार्यकर्ताको जमातले मात्र गन्तब्यमा पुगिने भन्दै प्रवासमा रहेका लाखौं परिश्रमी युवाहरुलाई देश निर्माणमा स्वदेश फर्काउनु आवश्यक भएको विचार ब्यक्त गरे ।
कार्यक्रममा केन्द्रीय सदस्य सरस्वती श्रेष्ठ, राजु श्रेष्ठ लगायतले आआफ्नो धारणा राखेका थिए । बुद्धिकृष्ण चौहानको संयोजकत्वमा राप्रपाको काठमाडौं–रामेछाप सम्पर्क समाज भेला आयोजक समिति गठन भएको छ ।
प्रतिक्रिया