दलित नेता लालविर सुनारको निधन

दैलेख, १४ चैत । दैलेखको दलित आन्दोलनका प्रणेता काँग्रेस नेता लालविर सुनारको ९३ वर्षको उमेर बुधबार निधन भएको छ । ५ वर्षदेखि दम रोगले थलिएका उनको उपचारको क्रममा नेपालगञ्जमा निधन भएको हो । उनको पार्थिव शरीर हिन्दू संस्कार अनुसार राप्ती सिधनियामा बुधबार नै दाहसंस्कार गरिएको जेठा छोरा धर्मबहादुर सुनारले जानकारी दिए ।

दलितहरुको मृत्युको बेला शंख फुक्न र दलितहरुले महायज्ञ लगाउन पाउनु पर्ने भनि धार्मिक अधिकार अभियानका उनी प्रणेता हुन् । २०४० देखि करिव १० वर्षको अनवरत संघर्षपछि दैलेखमा अहिले सबै ठाउँमा गैरदलितले जस्तै दलितहरुको मृत्युमा पनि शंख फुक्ने गरिन्छ ।

वर्गीय लालबीर सुनार २०१२ सालमा स्थापना भएको नेपाल प्रहरी सेवामा प्रवेश गर्ने पहिलो दलित व्यक्ति हुन् । राणाकालमै २००६ मा नेपाली काँग्रेसको सशस्त्र समूह जनमिलिसियाबाट राजनीतिमा संलग्न भएका र सो समूह २०१२ मा नेपाल प्रहरीमा गाभिंदा उनले प्रहरी सेवामा प्रवेश गरेका थिए ।

२०३० सालमा नेपाल प्रहरीको हवल्दार पदमा सेवा निबृत भएपनि निरन्तर काँग्रेसको राजनीतिमा जुटेका थिए । पश्चिम नेपालको जनमिलिसिया कमाण्डर बनेका काँग्रेस नेता रत्नबहादुर बिश्वकर्मालाई सफल योद्धाको रुपमा स्थापित गर्न लालबीर सुनारको महत्वपूर्ण योगदान रहेको काँग्रेस नेता जगतजंग थापाको भनाई छ ।

पञ्चायत कालमा पटक पटक गरी १२ वर्ष साविकको बसन्तमाला गाउँपञ्चायतको जनपक्षीय निर्वाचित वडाध्यक्षको जिम्मेवारी निर्वाह गरेका उनी नेपाली काँग्रेसको भ्रातृ संगठन नेपाल दलित संघका संस्थापक जिल्ला सभापति र संघको केन्द्रीय सदस्य समेत बनेका थिए ।