
– निशानदाजु भट्टराई
दाङ, २२ मंसिर । संविधान संशोधन प्रस्तावको विरोधमा प्रमुख प्रतिपक्षी नेकपा एमालेले आह्वान गरेको बन्दलाई चुनौति दिँदै प्रधानमन्त्री पुष्पकमल दाहाल ‘प्रचण्ड’ दाङ आउनुभएको छ ।
राप्ती नदीको पुल शिलान्यास गर्न प्रधानमन्त्री बुधबार (आज) दाङ आउने कार्यक्रम तय भएसँगै एमालेका भातृ संगठन अनेरास्ववियु र युवा सङ्घले मंगलबार अपराह्न आजका लागि जिल्ला बन्दको घोषणा गरेको थियो ।

बन्दले पूर्वपश्चिम राजमार्गमापर्ने सिसहनियाँ गाविस र कालाकाटे–गढवा सडकखण्ड अन्तर्गत गोबरडिहा गाविसको महदेवा गाउँलाई जोड्ने पुलको शिलान्यास कार्यक्रममा दाङ आउन लागेका प्रधानमन्त्रीलाई प्रभावित पार्ने अनुमान गरिएको थियो ।
तर, एमालेको बन्दलाई चुनौति दिँदै प्रधानमन्त्री प्रचण्ड कडा सुरक्षाका बीच दाङ आउनुभएको हो । उहाँलाई प्रमुख जिल्ला अधिकारी, पुल निर्माण सहयोग समितिका अध्यक्ष नन्दकुमार चौधरीसहित स्थानीयले स्वागत गरेका छन् ।
सुरक्षा व्यवस्था कडा, सेना समेत परिचालन
बन्दका बीच प्रधानमन्त्री दाङ आएपछि स्थानीय प्रशासनले सुरक्षा व्यवस्था कडा पारेको छ । ठूलो संख्यामा सडकभरी नेपाल प्रहरी र सशस्त्र प्रहरी परिचालन गरिएको छ । कार्यक्रम स्थलमा प्रहरी, सशस्त्रसँगै नेपाली सेनालाई पनि परिचालन गरिएको छ । ‘पुरै संकटकालमा चेक गरेजस्तै कार्यस्थलमा चेकिंग भयो,’ कार्यक्रममा उपस्थित राजु चौधरीले भने ।
सुरक्षाका लागि कपिलवस्तुबाट पनि प्रहरी मगाएको जिल्ला प्रहरी कार्यालय दाङले जनाएको छ । ‘केन्द्रको निर्देशन अनुसार जिल्लामा सुरक्षा व्यवस्था कडा पारिएको छ,’ दाङका एसपी धिरजप्रताप सिंहले भने- ‘प्रधानमन्त्रीको सुरक्षामा विशेष टोली खटाइएको छ ।’
सिसाहनिया पुलको शिलान्यास

पुलको लम्बाइ ८६० मिटर रहने छ । पुल निर्माण भएपछि दाङ्का गडहवा, सिसाहनिया, राजपुरलगायतका जनतालाई आवतजावत गर्न सजिलो हुनेछ ।
सो कार्यक्रममा सिँचाइमन्त्री दीपक गिरी, प्रधानमन्त्री कार्यालयका सचिव टङ्कमणि शर्मा, सडक विभागका उपनिर्देशक सरोजकुमार श्रेष्ठ तथा दाङ जिल्लाका सांसद् र अन्य राजनीतिक दलका कार्यकर्ताको उपस्थिति रहेको थियो ।














प्रतिक्रिया