मन्त्री भएपछि रमेश लेखक पहिलोपटक आफ्नो निर्वाचन क्षेत्र पुगे

भीमदत्तनगर, १४ भदौ । भौतिक पूर्वाधार तथा यातायातमन्त्री रमेश लेखकले कञ्चनपुरको दोधारा चादँनीमा प्रस्ताव गरिएको सुख्खा बन्दरगाहको योजनालाई अगाडि बढाइने बताउनुभएको छ ।

आज कञ्चनपुरको दोधारा चादँनीस्थित शारदा सरस्वती उमाविको चारकोठे विद्यालय भवनको उद्घाटन गर्दै मन्त्री लेखकले सुख्खा बन्दरगाहको कामलाई अगाडि बढाउने प्रतिवद्धता व्यक्त गर्नुभयो ।

त्यसैगरी, महाकाली नदीमा चार लेनको पक्की पुल निर्माणको योजना तयार भइरहेको जानकारी गराउँदै दोधारा चादँनीको जोगबुढा नदीमा पनि पुल निर्माण गरेर भारतीय सीमावर्ती बजारसम्म आवागमनलाई सहज बनाउने बताउनुभयो ।

दोधारा चादँनीको सडक, पुल र शिक्षामा देखिएको समस्या समाधानका लागि लागिपर्ने प्रतिवद्धता उहाँले व्यक्त गर्नुभयो ।

सांसद विकास कोषको रु सात लाख ५० हजार र अन्य गरी रु नौ लाखको लगानीमा निर्माण गरिएको भवन उद्घाटनपछि उहाँले दोधारा चादँनीकै पशुपति निमाविको भवन पनि उद्घाटन गर्नुभएको थियो । रासस