संखुवासभामा पिउने पानीको हाहाकार

– योगेन्द्र योगी
संखुवासभा, २५ वैशाख । पिउने पानीको संकट भोगिरहेका धुपु गाविसका बासिन्दाहरुमा लामो खडेरीका कारण पानीको मुहान सुकेपछि झनै समस्या भएको छ ।

पिउने पानीको अभावमा धुपुका बासिन्दाहरु काकाकुल बनेकाछन् । हरेक वर्षको गर्मी याममा सो क्षेत्रका बासिन्दाहरुले पिउने पानीको समस्या भोग्दै आएकाछन तर स्थायी समाधानकालागि सरोकारवाला निकायले कुनै चाँसो नदिएको धुपुका स्थानीय बासिन्दा वीर बहादुर योगीले बताए ।

दलित र जनजातिहरुको बसोवास रहेको सो वस्तीको समस्याका बारेमा सरोकारवाला निकाय समेत बेखवर रहेको देख्दा आफूहरु दुःखी भएको एक स्थानीयले बताए । पिउने पानीको खोजीमा स्थानीयहरु भौतारिनुपर्ने बाद्यता रहेको छ । तर त्यसको समाधानको दीर्घकालिन समाधानका बारेमा कसैले पनि सोचिदिएनन् अर्का स्थानीय बासिन्दा दल बहादुर योगीले बताए । पानीकै अभावमा घरघरमा निर्माण गरेका शौचालयहरु प्रयोगविहीन अवस्थामा पुगेका छन् ।

२०७२ चैतमा सो क्षेत्र खुला दिसामुक्त क्षेत्र घोषणा भएको थियो । तर अहिले पानीको अभावका कारण शौचालय प्रयोगमा ल्याउन समस्या हुने गरेको स्थानीयको भनाई छ । अहिले स्थानीयहरु शौचका लागि जंगल धाउनुपर्ने अवस्था रहेको उनीहरुको भनाई छ ।