दाङका यी दुई फिल्मकर्मीबीच यसरी भयो भिडन्त

काठमाडौं, १६ चैत । कलाकार गणेश बेल्वासेले निर्माण गरेको ‘उहिलेको बाजेको पालामा’ र दीपक ओलीले निर्देशन गरेको ‘रोल्पा रोग’ एकआपसमा भिड्ने भएका छन् ।

दुबै फिल्मले एकआपसमा सल्लाह नगरेर फिल्मको रिलिज डेट सार्वजनिक गरेपछि गृह जिल्ला दाङ भएका यी दुई फिल्मकर्मीका फिल्म जुध्न लागेका हुन् ।

‘उहिलेको बाजेको पालामा’ र ‘रोल्पा रोग’ दुबै फिल्म दाङका साथै विभिन्न जिल्लामा पुगेर छायाँकन गरिएको थियो । दुबै फिल्मले आफ्नो रिलिज डेट वैशाख २४ रोजेका छन् ।

‘उहिले बाजेको पालामा’ले सोमबार काठमाडौंमा पत्रकार सम्मेलन गरेर वैशाख २४ गते राजधानी उपत्यकामा र जेठ ७ गते उपत्यका बाहिरका हलहरूमा फिल्म चलाउने घोषणा गरेको थियो ।

तर, वैशाख १७ गते रिलिजको मिति घोषणा गरेको दीपक ओलीका फिल्म ‘रोल्पा रोग’ले सोमबार नै अचानक वैशाख २४ गते आफ्नो रिलिज मिति तोकेको हो ।

‘उहिले बाजेको पालामा’को निर्माण पक्षले आफ्नो फिल्म प्राविधिक र कथावस्तु सबै पक्ष सबल रहेको दाबी गर्दै कुनै फिल्म आफूसँग आएर जुध्दैमा केही फरक नपर्ने बताउँछ । ‘रोल्पा रोग’ले पनि वैशाख १७ गते अरु ठूला ब्यानरका फिल्मसँग जुध्नुपर्ने बाध्यता रहेकाले वैशाख २४ मा रिलिज समय राखिएको जनाएको छ ।

दाङका यी दुई फिल्मका हस्ती गणेश बेल्वासे र दीपक ओलीको यो कार्यले अन्त्यमा दुबैलाई बेफाइदा हुनेछ ।

‘उहिले बाजेको पालामा’ पुरानो संस्कृति एवम् दुई गाउँबीचको सत्रुतापूर्ण व्यवहारलाई देखाउन खोजिएको छ । ‘रोल्पा रोग’ले माओवादीको युद्धबाट गाउँका युवा पीडित भएको विषयलाई आफ्नो कथामा राखेको छ ।

‘उहिले बाजेको पालामा’ केही ब्रान्डेड र पुराना कलाकार छन् । ‘रोल्पा रोग’मा सबै नयाँ पुस्ताको बर्चस्व छ ।