काठमाडौं, २८ माघ । बंगलादेशमा जारी यू–१९ विश्वकप क्रिकेट प्रतियोगिता अन्तर्गतको ‘प्ले अप’ खेलमा नामिबियाले नेपालसामू २२६ रनको लक्ष्य प्रस्तुत गरेको छ ।
बंगलादेशको फतुल्लाह मैदानमा टस जितेर ब्याटिङ रोजेको नामिबियाले निर्धारित ४५ ओभरको खेलमा ९ विकेट गुमाएर २२५ रन बनायो ।
बिहान पौने ९ बजेका लागि तय भएपनि खेल कुहिरोका कारण अबरुद्ध भएको थियो । र खेललाई ४५ ओभरमा छोट्याइएको थियो ।
आजको खेल जित्नैपर्ने दबाब दुबै टिममाथि छ । किनभने आजको खेलले जित्ने एक टिमलाई न्युजिल्यान्डमा हुने विश्वकपमा सिधै प्रवेश गराउने छ भने हार्ने टिमले फेरि छनोटको नयाँ चरणबाट सुरु गर्नुपर्नेछ ।
तथ्यांक अनुसार नेपालले नामिबियासँग अहिलेसम्म ३ पटक खेलेको छ । जसमा नेपाल तीनै पटक विजयी भएको छ ।
यसअघि नेपाल आफ्नो पाँचौ खेलमा पाकिस्तानसँग पराजित भएको थियो । यो छैठौं खेल विश्वकपको बाटो पछ्याउन नेपालका लागि महत्वपूर्ण छ ।
आजको खेलले प्रतियोगितामा सातौं र आठौं स्थानमा रहने टिमको पनि निर्धारण गर्नेछ ।
हेर्नुस् भिडियो:
प्रतिक्रिया