सिमसार क्षेत्रमा पाइने चराको प्रजाति घटे

परासी, ५ माघ । नवलपरासीको सिमसार क्षेत्रमा पाइने चराको प्रजातिको सङ्ख्या यस वर्ष घटेको तथ्याङ्क सार्वजनिक भएको छ ।

नारायणी नदी किनार आसपासमा रहेका सिमसार क्षेत्रमा गरिएको गणना कार्यबाट सो तथ्याङ्क सार्वजनिक भएको हो ।

अघिल्लो वर्षकोे गणनामा ४७ प्रजातिका पक्षी गणना गरिए पनि यसपटक सो अनुपातमा कममात्रामा चराको प्रजातिको सङ्ख्या गणना गरिएको प्रकृतिविद् डिबी चौधरी जानकारी दिनुभयो ।
चौधरीको नेतृत्वमा १७ जनाको समूहले सिक्रौलीदेखि अमलटारीसम्म नारायणी नदीको किनारमा गरेको चरा गणनामा ३४ प्रजातिका चरा फेला पारेको थियो ।

यस्तै प्रकृतिविद् भागिरथ चौधरीको नेतृत्वमा १३ जना संरक्षणकर्मीको सहभागितामा अमलटारीदेखि त्रिवेणीसम्म गरिएको नारायणी नदीको किनारको चरा गणना कार्यमा २६ जातिको चरा फेला पारेको चौधरीले बताउनुभयो ।

प्रत्येक वर्ष यही समयमा यहाँ चरा गणना गरिँदै आएको छ । थारु भिलेज रिसोर्टको व्यवस्थापनमा बर्सेनि चरा गणना हुने गरेको हो । पछिल्लो केही वर्षयता सारस केरेन, ब्लाक विड टर्न, ब्लाक नेक्ड स्टोर्क, स्पट विल्ड पेलिकनलगायतका पक्षी नारायणी नदी आसपासमा देखिन छाडिसकेको संयोजक चौधरीले बताउनुभयो ।

चितवन राष्ट्रिय निकुञ्जमा पाइने १११ प्रजातिमध्ये गत वर्ष ४७ प्रजातिमात्र भेटिएपछि संरक्षणकर्मीले पक्षीको खोजी र अनुसन्धानलाई तीव्रता दिएका छन् । भुँडीफोर, केरेङकुरुङ, चखेवाको सङ्ख्यामा बर्सेनि घटेको छ । आगन्तुक चरासमेत आउन छाडेकाले वातावरणीय सन्तुलनका लागिसमेत योजना बनाउन पक्षी गणनाले महत्व पु¥याउने गरेको छ ।

विश्वमा पाइने पक्षीमध्ये भmन्डै १० प्रतिशत पक्षी नेपालको अभिलेखमा सूचीकृत भएका छन् । जसमध्ये ३३ प्रजातिका पक्षी विश्वमा नै दुर्लभ मानिन्छन् । यीमध्ये ११ प्रजातिका पक्षी सिमसार क्षेत्रमा पाइन्छन् । रासस