‘भारतलाई विस्थापित गरेर चीनसँग व्यापार सम्बन्ध बढाउनु सरकारको पहिलो प्राथमिकता’

काठमाडौँ, २६ पुस । कानुन, न्याय तथा संसदीय मामिला मन्त्री अग्निप्रसाद खरेलले चीनसँगको व्यापारका लागि सरकारले जतिसक्दो चाँडो नाका खुलाउने तयारी गरिरहेको बताउनुभयो ।

नेकपा (एमाले) निकट झापा–काठमाडौँ सम्पर्क समितिको १० औँ अधिवेशनको उद्घाटन गर्दै उहाँले खासगरी केरूङ नाका र तातोपानी नाकालाई खोल्नेबारे सरकारले प्राथमिकताका साथ सम्बन्धित पक्षसँग छलफल गरिरहेको बताउनुभयो ।  चीनसँग व्यापार प्रक्रिया अघि बढेसँगै भारत विस्थापित हुने मन्त्री खरेलको भनाई छ ।

उहाँले मधेशी समुदायले उठाउँदै आएको जायज मागलाई संविधान संशोधन गरेर भएपनि पूरा गर्नुपर्नेमा जोड दिनुभयो । बन्द, हड्ताल, नाकाबन्दी र त्यसले निम्त्याएको समस्या समाधान गर्नेतर्फ सरकार तल्लीन रहेको उहाँको भनाइ छ ।

नेकपा (एमाले) का पोलिटव्युरो सदस्य देवराज घिमिरे र केन्द्रीय सदस्य रविन कोइरालाले जनताको चाहनाअनुरूपको संविधान जारी भएको अवस्थामा त्यसको प्रभावकारी कार्यान्वनका लागि सबै दल एकीकृत हुनुपर्छ भन्नुभयो । रासस