रौतहट, ९ पुस । यस जिल्लाको सरमुजवा–६ स्थित बङ्कुलमा संयुक्त लोकतान्त्रिक मधेसी मोर्चाका कार्यकर्ताले आज बिहान जिपमा आगजनी गरेका छन् ।
सीमावर्ती भारतीय बजार घोडासहनबाट राति ९ बजे ५०० लिटर डिजेल बोकेर आएको बिआर ०१ पिए ६७९८ नम्बरको भारतीय बोलेरो जिपमा मोर्चाका कार्यकर्ताले आगजनी गरेको जिल्ला प्रहरी कार्यालय रौतहटले जनाएको छ ।
बन्दको मौका छोपी तेल तस्करी गरेको भन्दै मोर्चाका कार्यकर्ताले जिपमा आगजनी गरेका थिए । जिप पूर्णरुपले नष्ट भएको छ । आगजनी गरेको खबरपछि प्रहरीले घटनास्थलमा पुगी आगो नियन्त्रणमा लिएको थियो । जिपमा आगजनी गर्नेहरुको खोजी भइरहेको प्रहरीले जनाएको छ । रासस
प्रतिक्रिया