काठमाडौँ, २ पुस । कालोबजारीका विषयमा सुनिएका जनगुनासो सम्बोधन गर्न जिल्ला प्रशासन कार्यालय (जिप्रका) काठमाडौँले स्पष्ट योजना बनाएर कार्यान्वयन गर्ने भएको छ ।
नेपाल पत्रकार महासङ्घसँगका प्रतिनिधिसँग आज जिप्रकामा गरिएको अन्तरक्रियामा प्रमुख जिल्ला अधिकारी रामकृष्ण सुवेदीले कालोबजारी नियन्त्रण र शान्तिसुरक्षा कायम गर्न कुनै कसर बाँकी नराख्ने बताउनुभयो ।
तराई–मधेसमा जारी आन्दोलन र भारतको अघोषित नाकाबन्दीका कारण बजारमा खाद्यान्न तथा पेट्रोलियम पदार्थको अभाव भएको समयमा कालोबजारी नियन्त्रण प्रमुख चुनौती भएको उहाँको भनाइ थियो ।
जनताले प्रत्याभूत गर्ने गरी स्पष्ट योजना बनाएर अगाडि बढाउने उल्लेख गर्दै प्रजिअ सुवेदीले बजार अनुगमनमा पत्रकार महासङ्घका प्रतिनिधिलाई पनि समावेश गर्ने बताउनुभयो ।
नेपाल पत्रकार महासङ्घका उपाध्यक्ष खिलबहादुर भण्डारीले अभावका समयमा भएको मूल्य वृद्धिका कारण जनता मारमा परेको भन्दै जिप्रकाको ध्यान त्यसतर्फ जानुपर्नेमा बताउनुभयो ।
अन्तरक्रियामा सहभागी पत्रकारले कालोबाजारी नियन्त्रण गर्न समन्वयात्मक रुपमा अगाडि बढ्नुपर्ने र पत्रकारलाई सहज रुपमा इन्धन उपलब्ध गराइदिन अनुरोधसमेत गरेका थिए । रासस
प्रतिक्रिया