मधेसी मोर्चाको असहमतिका बीच संसदको बैठक सुरु, संशोधन प्रस्ताव अगाडि बढ्ने

काठमाडौं, २९ मंसिर । प्रमखु विपक्षी दल नेपाली कांग्रेस र मधेसी मोर्चाको अबरोधका कारण लामो समयदेखि अबरोध हुँदै आएको व्यवस्थापिका संसदको बैठक आज पुनः सुरु भएको छ । संसदको कार्यसूचीअनुसार संविधान संशोधनका दुई वटा विधेयक पनि पेश हुनेछ ।

बैठकको सुरुमै मधेसी मोर्चाका सांसदहरूले उठेर अबरोध गरेका छन् । उनीहरूको अबरोधकाबीच संसदको कार्यसूचीअनुसार कामकारबाही अगाडि बढेको छ ।

सरकारका तर्फबाट कानुन, न्याय तथा संसदीय मामिलामन्त्री अग्निप्रसाद खरेलले दुई वटा प्रस्ताव पनि पेश गर्नु हुनेछ ।

उहाँले नेपालको संविधान (पहिलो संशोधन) २०७२ प्रस्तुत गर्न अनुमति माग्ने प्रस्ताव प्रस्तुत गर्नु हुनेछ । मन्त्री खरेलले नेपालको संविधान (पहिलो संशोधन) २०७२ पनि प्रस्तुत गर्ने कार्यसूचीमा उल्लेख छ ।

यी दुई विधेयकमा राज्यका हरेक अंगमा समावेशी र मानुपातिक सहभागिता र जनसंख्या र भौगोलिक आधारमा निर्वाचन क्षेत्र निर्धाण गर्ने विषय उल्लेख छ ।

त्यसैगरी विधायन समितिका सभापति गंगा चौधरीले भूकम्पबाट प्रभावित संरचनाको पुनःनिर्माण विधेयकसम्बन्धी समितिको प्रतिवेदन, २०७२ सदन समक्ष पेश गर्नु हुनेछ ।

प्रमुख विपक्षी दल नेपाली कांग्रेसले भने आजको संसद बैठक अबरोध नगर्ने जनाएको छ । स्रोतका अनुसार सरकारले संविधान संशोधनको प्रस्ताव एउटै कार्यसूचीमा राखेकाले सदन अबरोध नगर्ने सहमति भएको छ ।