मेरो कामको मुल्यांकन भएको छ, यसपालि जित्छु: परमानन्द भण्डारी (सचिव पदका उम्मेदवार)

कञ्चनपुर उद्योग वाणिज्य संघको १३ औं समितिबाट सदस्यमा निर्वाचित भएर कार्यसमितिमा प्रवेश गरेका व्यवसायी परमानन्द भण्डारी १५ औं नयाँ कार्यसमितिका लागि सचिव पदमा उम्मेद्वारी दिने तयारीमा छन् । १४ औं कार्यसमितिका लागि समेत सचिव पदको उम्मेद्वारी दिएर हार व्यहोरे पनि उनलाई सदस्य पदमा मनोनयन गरिएको थियो ।

पर्यटन व्यवासायी भण्डारीलाई पर्यटन व्यवसाय सम्बन्धी राम्रो ज्ञान छ । उनी कञ्चनपुरमा पर्यटन व्यवसायको प्रभावकारि विकास गर्न सके आर्थिक विकास हुने ठान्छन् । नयाँ कार्यसमितिका लागि सचिव पदको लागि उम्मेद्वारी दिने तयारीमा रहेका भण्डारीसँग आगामी उद्योग वाणिज्य संघको नयाँ निर्वाचन र चुनावी तयारी सम्बन्धमा दैनिक नेपालले गरेको कुराकानिको सम्पादित अंशः

उद्योग वाणिज्य संघको १५ औं नयाँ कार्यसतिका लागि अधिवेशन हुँदैछ । कस्तो छ चुनावी तयारी ?

चुनावी तयारी राम्रो छ । विशेषतः शुभचिन्तक र समर्थक व्यवसायी साथिहरुको सुझावका आधारमा सचिव पदको लागि उम्मेद्वारी दिने तयारीमा छु ।

वर्तमान समितिका लागि पनि तत्कालिन अवस्थामा सचिव पदमा नै उम्मेद्वारी दिनुभएको थियो, त्यतिबेला हार्नु भयो । यसपटकको चुनावी माहौलबाट के अपेक्षा गर्नुभएको छ ?

त्यतिबेलाको अभ्यासले अहिले परिपक्व बनाएको महसुस गरेको छु । त्यतिबेला चुनावमा हारे पनि सवै व्यवसायी साथिले मेरा कामको मुल्याङ्कन गरेर मलाई कार्यसमितिमा समावेश गराइनुपर्ने आवश्यकता महसुस गर्नुभयो र मलाई सदस्य पदमा मनोनयन गरियो । खासमा मेरो कामको मुल्याङ्कन सबैजनाले गर्नुभएको छ । त्यसकारण पनि यसपटक सकारात्मक परिणाम आउनेमा म आशावादी छु ।

आगामी समितिमा निर्वाचित भइसकेपछि के गर्छु भन्ने योजना बनाउनु भएको छ ?

खासमा मेरो व्यवसायिक क्षेत्र भनेको पर्यटनसँग सम्बन्धित छ । र मेरो प्राथमिकता पर्यटन क्षेत्रप्रति नै बढी हुनेछ । यद्यपी अरु क्षेत्रका औद्योगिक तथा व्यवसायिक विकासका लागि पनि मेरो सक्रियता हुनेछ । तर, अरु क्षेत्रका व्यवसाय तथा उद्योगहरुको विकासका लागि पर्यटन क्षेत्रले उत्प्रेरकको रुपमा काम गर्छ । पर्यटकहरुको संख्या बढ्यो भने यहाँका स्थानीय उत्पादनको प्रयोग बढ्ने छ र यहाँको व्यवसाय फस्टाउँछ । यसहिसावले पर्यटन क्षेत्रको विकास गर्न सकियो भने यहाँको समग्र आर्थिक विकासका लागि राम्रो प्रभाव पर्छ भन्ने मेरो व्यक्तिगत बुझाई र अनुभव छ ।

उद्योगवाणिज्य संघमा यसअगिाडि पनि धेरै योजना बने । तर, कार्यान्वयनको चरण त्यति प्रभावकारी भएन् । योजना कार्यान्वयनका लागि तपाईको के प्रयास हुनेछ ?

उद्योग वाणिज्य संघमा नयाँ कार्यसमिति निर्माण भइसकेपछि अध्यक्ष सहितको टीमले योजना बनाउँछ । र, त्यसको कार्यान्वयनको लागि कार्यसमितिमा रहेका सदस्य र बाहिरका अन्य व्यवसायीको पनि उक्तिकै सहयोग र साथ हुन्छ । वर्तमान कार्यसमितिको कुरा गर्दा यस पटक अरु कार्यसमितिको भन्दा धेरै योजनाहरु कार्यान्वयन भएका छन् । जस्तो बनबासाको नाका ३ घण्टाबाट ७ घण्टा खोल्ने सम्बन्धमा । त्यसमा प्रगति भएको मान्नुपर्दछ । अनि दैजीको छेलमा स्थापना गर्ने भनिएको औद्योगिक क्षेत्रको फाइल केहि समयदेखि वनमन्त्रालयमा थन्किएको थियो । त्यसलाई हामीले सक्रिय बनाएका छौं । विभिन्न पटक वनमन्त्रालयका पदाधिकारी र वनमन्त्रीसँग पनि हामीले छलफल गरेर फाइल अगाडि बढाइदिन अनुरोध गरेका छौं ।

उद्योग वाणिज्य संघको चुनावका बेला व्यवसायीका हकहितका पनि बढी चर्चामा आउने गर्छन । यसमा तपाईले आगामी दिनमा गर्न सकिने प्रयासका बारेमा के योजना बनाउनु भएको छ ?

नेपालको कानून बमोजिम सम्बन्धित निकायमा दर्ता भएर संचालनमा आएका अद्योग तथा व्यवसायीक फर्मका संचालकहरुलाई पर्ने समस्या र त्यसको समाधानका लागि गरिने पहललाई व्यवसायिको हितका लागि गरिने कार्य भनेर बुझिन्छ । यसका लागि उद्योग वाणिज्य संघले सदैव परैवी गर्दै आएको छ । राज्यपक्षबाट उद्योगी तथा व्यवसायीमाथि हुने अन्यायका विरुद्ध उद्योग वाणिज्य संघ सदैव उभिएको छ । मैले व्यक्तिगत रुपमा भन्नु पर्दापनि म जहिले पनि व्यवसायिहरुको हितको लागि आवाज उठाउँदै आईरहेको छु । चाहे संघ भित्र वा बाहिर । आगामी समितिमा निर्वाचन भयो भने पनि म अझै व्यवसायीहरुको हित र अधिकारका लागि काम गर्नेछु । र, व्यवसायको व्यवस्थापन तथा प्रवद्र्धनका लागि पनि मेरो प्रयास हुनेछ ।

पर्यटन व्यवसायलाई तपाईले विशेष जोड दिँदै आउनु भएको छ । यसको विकासको संभावना कति देख्नु भएको छ ?

पर्यटन व्यवसायमा तत्काल धेरै ठुलो कमाई हुने भन्ने हुँदैन । निरन्तरको प्रयासले यसबाट क्रमिक रुपमा लाभ लिन सकिने हो । पर्यटन व्यवसायको विकासका लागि हाम्रो क्षेत्रमा राज्यपक्षबाट धेरै कुरा गर्नु आवश्यक छ । पहिलो क्रममा त यस क्षेत्रलाई राज्यले पर्यटकहरुको गन्तव्यको रुपमा विकास गर्नु पर्छ भन्ने हो । अनि अर्को, भौतिक पूर्वाधारहरुको विकास पनि त्यति नै महत्वपूर्ण छ । जस्तै सडकहरुको स्तारोन्नति र सडकहरुको विकास गर्नु पर्छ । जो राज्यको महत्वपूर्ण जिम्मेवारी पनि हो । नीजि र सामुदायिक सहकार्य मार्फत यस क्षेत्रमा पर्यटन व्यवसायको विकास हुने संभावना छ । पर्यटन व्यवसायको विकासले यहाँका उद्योग र व्यवसायहरुको पनि विकास हुन्छ । स्थानीयले राजगारी पाउँछन् । अनि स्थानीय वस्तुहरुको पनि बिक्री हुन्छ । यस क्षेत्रको लागि पर्यटनको विकास महत्वपूर्ण छ र यसको संभावना पनि धेरै छ ।

आफ्ना प्रतिनिधिप्रति हरेक क्षेत्रका मतदाताको कुनै न कुनै प्रकारको अपेक्षा राखेका हुन्छन् । तपाईप्रति पनि तपाईका मतदाताको कुनै अपेक्षा होला । आगामी कार्यसमितिमा निर्वाचित भए तपाईलाई मत दिने मतदाताहरुको पक्षमा तपाईले के गर्नु हुन्छ ?

मेरा मतदाता भनेका समस्त उद्योगी र व्यवसायी साथीहरुनै हो । मैले उहाँहरुकै हक र हितका लागि काम गर्ने हो । चाहे त्यो नीतिगत हो या अन्य विषय । म सवै विषयलाई व्यवसायीहरुको हितसँग जोडेर सोच्छु र कार्य पनि त्यहि अनुसार गर्छु । भेट भएका बेला प्राय सवैजसो साथीहरुसँग व्यवसायिक विकास र व्यवसायीहरुका हक हितका विषयमा केन्द्रीत रहेर कुरा गर्ने तथा उहाँहरुका कुरा सुन्ने गर्छु । व्यवसायीहरुको सुझाव अनुसार अझ पनि उहाँहरुको हक र हितमा काम गर्नेछु ।

प्रस्तुतीः डम्बर राज भट्ट/महेन्द्रनगर ।