वीरगञ्ज नाकामा बसेका मधेसी मोर्चाका आन्दोलनकारीलाई भारतीय समूहले कुटेर लखेट्यो

वीरगञ्ज, १६ मंसिर । मधेसमा जारी आन्दोलनले विगत तीन महिनादेखि ठप्प वीरगञ्ज रक्सौल नाका सूचारु भएको छ ।

धर्नामा बसेका संयुक्त लोकतान्त्रिक मधेसी मोर्चाका आन्दोलनकारीलाई भारतीयहरुको एक समूहले आक्रमण गरेर लखेटेपछि वीरगञ्ज नाका सञ्चालनमा आएको हो ।

जिल्ला प्रहरी कार्यालय पर्साका अनुसार साँझ साढे ८ बजे नाकामा आन्दोलनकारी कम भएको समयमा भारतीयहरुको एक समूहले आक्रमण गरेको हो । आक्रमणमा पाँच जना आन्दोलनकारी घाइते भएका छन् । घाइतेको नारायणी उपक्षेत्रीय अस्पतालमा उपचार भइरहेको छ ।

आक्रमणपछि आन्दोलनकारी तितरबितर भएका छन् । उक्त नाकाबाट केही भारतीय ट्रकहरु वीरगञ्जबाट रक्सौल छिरेका छन् । राजधानी काठमाडौंसहित देशभरका लागि ७० प्रतिशत आपूर्ति हुने वीरगञ्ज नाकामा मधेसी मोर्चाले तीन महिनादेखि अवरुद्ध गर्दै आएको थियो ।