प्रमुख प्रतिपक्षी दल कांग्रेससँग मिलेर थारु र मधेसीवादी दलले संसद अवरुद्ध गरे

काठमाडौं, ६ मंसिर । व्यवस्थापिका संसदको आजको बैठक कार्यसूचीमा प्रवेशै नगरी स्थगित भएको छ ।

आन्दोलनरत थारु र मधेसवादी दलका सांसदहरुले प्रमुख प्रतिपक्षी दल कांग्रेससँग मिलेर नाराबाजी गर्दै बैठकमा अवरोध गरेपछि संसदको कामकारवाही अगाडी बढ्न नसकेको हो ।

करिब २५ मिनेट नाराबाजीपछि सभामुख ओनसरी घर्तीले मंसिर १० गतेसम्मका लागि संसदको कामकारवाही स्थगित भएको घोषणा गरिन् । संसदमा थारु र मधेससहित ८ दलका सांसदले नाराबाजी तथा रोष्टम घेराउ गरेका थिए ।

आजको बैठकमा कांग्रेसका कार्यबाहक सभापति रामचन्द्र पौडेल बोलका थिए । उनी बोलिसक्ने वित्तकै विरोध सुरु भएको थियो ।
अब अर्काे बैठक मंसिर १० गते ११ बजे बोलाइएको छ ।

थारु र मधेसीका माग सम्बोधन गर्न माग गर्दै ८ वटै दलले संसद अवरुद्ध पारेका हुन् । कांग्रेसले पनि थारु र मधेसीका माग सम्बोधनका लागि सरकारलाई दबाब दिन संसद बैठक अवरुद्ध पारेको हो ।