काठमाडौं, २५ कात्तिक । राष्ट्रिय प्रजातन्त्र पार्टीका अध्यक्ष पशुपतिशम्शेर जबरा राणाले तिहारमा कुकुरसँग हिँडेर रमाइलो गर्ने बताउनुभएको छ ।
उहाँले आफूलाई कुकुर मन पर्ने भएकाले कुकुरलाई लिएर उकालो चढ्ने योजना बनाएको बताउनुभएको हो ।
नेपालवाणी रेडियो नेटवर्कमा पत्रकार ऋषि मधमलासँग कुरागर्दै अध्यक्ष राणाले भन्नुभयो, ‘ म कुकुर लिएर उकालो चढ्छु । कुकुरसँग हिँड्न मन पराउँछु । तिहारमा दिदीसँग टीका लगाउँछु । धेरै रमझम गर्दिन ।’
त्यसो भए तपाई तिहारमा कुकुरसँग उकालो चढ्नु हुन्छ ? जवाफमा राणाले भन्नु भयो, ‘हो म कुकुरसँग उकालो चढ्न मन पराउँछु ।’
यसैबीच, राप्रपा अध्यक्ष राणाले प्रधानमन्त्री केपी ओलीले पार्टीबाट मन्त्री बन्नेहरूको नाम नमागेको बताउनुभएको छ ।
‘प्रधानमन्त्री ज्यूले मन्त्रीको नाम माग्नुभएको छैन’, उहाँले भन्नुभयो, ‘नाम माग्नुभयो भने केन्द्रीय नेतृत्वमा नरहेका सांसद साथीहरूलाई पठाउँछु ।’
राप्रपाभित्रको विवाद मिलाउने आफूले कोशिस गरिरहेको राणाले बताउनुभयो । उहाँले पार्टीको विवाद मिलाउनकै लागि लोकेन्द्रबहादुर चन्दसँग एक/दुई पटक कुराकानी गरेको पनि उल्लेख गर्नुभएको छ । कुराकानी भएपनि अझै नमिलेको राणाले बताउनुभयो ।
लोकेन्द्रबहादुर चन्दले पार्टीको बहुमत सदस्यको निर्णयअनुसार आफू अध्यक्ष दाबी गर्दै निर्वाचन आयोगलाई जानकारी गराएपछि राप्रपामा एउटा समूहको चन्द र अर्को समूहको नेतृत्व राणाले गर्दै आउनुभएको छ ।
प्रतिक्रिया