काठमाडौं, १८ कात्तिक । राष्ट्रपति छान्ने अघिल्लो दिन बालुवाटारमा बसेको एमाले स्थायी समिति बैठकमा प्रधानमन्त्री केपी ओलीले सरकार ढाल्ने खेल सुरु भैसकेको रहस्योद्घाटन गर्नु र दक्षिणी दलाल अमरेशकुमार सिंहले फागुनको कांग्रेस महाधिवेशनलगत्तै सरकार परिवार्तनको खेलले तीव्रता पाउने दावी गर्नुकावीच के तादात्म्यता होला ?
कात्तिक १० गते बालुवाटारमा शीर्ष नेताहरूको बैठकलाई ब्रिफिङ गर्दै ओलीले सरकारलाई जसरी पनि टिकाउनेभन्दा केही गरेर जनतामा छाप छोड्न पाए राम्रो हुने मनशाय व्यक्त गरेको जनआस्था साप्ताहिकले छापेको छ ।
त्यसैको हाराहामीमा अमरेशले एकथरि एमाले नेताहरूलाई धम्की दिए, ‘अबको कोशिस प्रचण्डलाई लोभ्याउनु हुनेछ ।’ उनका अनुसार उपराष्ट्रपति, सभामुख र रोजेको मन्त्रालय पाइकेको एमाओवादीलाई प्रधानमन्त्रीको अफर गरिनेछ ।
यसो गर्दा १० वर्ष लडेर नपाइएको राजकीय सत्ता चुनावमार्फत, कुटनीतिक बलमा प्राप्त भएको सन्देश दिन सहज हुनेछ र यसबाट माओवादी विभाजनको असरलाई न्युनिकरण गर्न पनि उनलाई सहज हुनेछ ।
त्यस्तो सरकारमा मधेसी र नेपाली कांग्रेसलाई पनि सामेल गराएपछि बल्ल एक खालको दीर्घकालीन भारतीय ग्राण्ड डिजाइनले सार्थकता पाउनेछ ।
दक्षिण पहिले पनि नेपालको सन्दर्भमा पार्टीहरूभित्र फस्र्टम्यान होइन सेकेण्ड म्यानलाई च्याप्ने नीति अवलम्बन गर्दै आएको छ ।
कांग्रेसमा सुशील कोइरालाको सट्टा शेरबहादुर देउवा उसको पहिलो रोजाइ बन्यो । एमाओवादीमा बाबुरामलाई त्यस्तै गरियो । लामो समयसम्म एमालेले पनि यही नियति भोग्दै आएको हो ।
यही चालबाजी बुझेपछि सुशील, प्रचण्ड र केपी ले जस्तोसुकै मूल्य चुकाएर भए पनि एकथान संविधान देखाइदिनकै निम्ति जारी गरेका हुन् । त्यसका विरुद्ध महिनौँदेखि नाकाबन्दीको अस्त्र लगायतको अस्त्र प्रहार भइरहेको छ ।
प्रतिक्रिया