काठमाडौं, १२ कात्तिक । उच्चस्तरीय राजनीतिक संयन्त्रले मधेसी मोर्चाले अघि सारेका मागका विषयमा प्रमुख विपक्षी दल नेपाली कांग्रेससँग सहकार्य गरेर अगाडि बढ्ने निर्णय गरेको छ ।
बालुवाटारमा आज बसेको संयन्त्रको बैठकले मधेसी मोर्चाले राखेका मागका विषयमा कांग्रेससँग पनि छलफल गरेर संविधान संशोधन गरी निकास खोज्ने सहमति गरेको हो । मधेसी मोर्चाले राखेका माग सम्बोधान गर्नका लागि नेपालको संविधान २०७२ संशोधन गर्नुपर्ने हुन्छ ।
मधेसी मोर्चाले सिमाङ्कन, जनसंख्याका आधारमा निर्वाचन क्षेत्र निर्धाण, नागरिकतालगायतका विषयलाई जोडदार रुपमा उठाउँदै आएको छ ।
नेपालको संविधान २०७२ संशोधनका लागि कांग्रेसको सहयोग अनिर्वाय हुन्छ । संविधान संशोधनका लागि आवश्यक पर्ने दुई तिहाइ बहुमत कांग्रेसले समर्थन गरेमा मात्रै पुग्छ ।
त्यसै गरेर राजनीतिक संयन्त्रले भारतले नेपालमा लगाएको अघोषित नाकाबन्दीका विषयमा गम्भीर छलफल गरेको छ । संयन्त्रले भारतसँग कुटनीतिक पहल गरेर आपूर्ति व्यवस्था सहज बनाउन सरकारलाई पुनः आग्रह गरेको छ ।
बैठकले भारतमा रहेका र नेपालमा शुभेच्छा राख्ने राजनीतिक दलहरूसँग सम्पर्क गरी अघोषित नाकाबन्दी खोल्नका लागि पहल गर्ने निर्णय पनि गरेको छ ।
मुलुकको पछिल्लो राजनीतिक अवस्थाका विषयमा छलफल गरेको राजनीतिक संयन्त्रले नाकाबन्दीले भएको अस्तव्यस्तताका कारण भोग्नु परेको मस्याको छिटो समाधान खोज्ने निर्णय पनि गरेको छ ।
एकीकृत माओवादीका अध्यक्ष तथा राजनीतिक संयन्त्रका संयोजक पुष्पकमल दाहालको अध्यक्षतामा बसेको बैठकमा प्रधानमन्त्री केपी ओलीका साथै सत्तारुढ दलका नेताहरूको पनि सहभागिता रहेको थियो ।
प्रतिक्रिया