शीतलनिवासबाट यसरी हुँदैछ रामवरणको विदाई

काठमाडौँ, १२ कात्तिक । राष्ट्रपति डा रामवरण यादवलाई शीतलनिवासबाट आज विदाई गरिँदैछ ।

राष्ट्रपतिमा विद्यादेवी भण्डारी निर्वाचित भएपछि यादव आजदेखि ललितपुरको बागडोलस्थित भाडाको घरमा सर्ने हुनुभएको छ ।

व्यवस्थापिका–संसद्बाट बुधबार राष्ट्रपति पदमा भण्डारी निर्वाचित भएसँगै राष्ट्रपति डा यादव शीतलनिवासबाट सर्न लाग्नुभएको हो ।

नवनिर्वाचित राष्ट्रपति भण्डारीको शपथग्रहण समारोहपछि सरकारले आज आयोजना गर्ने बिदाइ समारोहपछि उहाँ साँझ बागडोल सर्नुहुने उहाँका प्रेस सल्लाहकार राजेन्द्र दाहालले जानकारी दिनुभयो ।

सरकारले आज दिउँसो राष्ट्रपति यादवको बिदाइमा एक समारोहको आयोजना गर्दैछ । शपथग्रहण समारोह सकिएको डेढ घन्टापछि सरकारले गर्ने भिन्नै समारोहमा राष्ट्रपति यादवको बिदाइ गरिनेछ ।

उहाँ २०६५ साउन ६ गते गणतन्त्र नेपालको प्रथम राष्ट्रपति चुनिनुभएको थियो ।